काठमाडौं । कोरोना भाइरसको संक्रमण बढ्न थालेपछि अमेरिकी राष्ट्रपति डोनाल्ड ट्रम्पले राष्ट्रिय संकटकालको घोषणा गरेका छन् ।

राष्ट्रपति ट्रम्पले ह्वाइटहाउसमा पत्रकार सम्मेलन गरी संकटकालको घोषणा गर्नुभएको हो । संकटकाल घोषणापछि अब ट्रम्पले ५० बिलियन अमेरिकी डलरको प्रकोप राहत कोष कोरोनासँग जुघ्न प्रयोग गर्नुहुनेछ । ट्रम्पले कोरोना संक्रमणबिरुद्ध लड्न ५० बिलियन डलरको कोष परिचालन गर्ने घोषणा गर्नुभएको छ ।

अमेरिकामा अहिलेसम्म २ हजार ४५ जनामा कोरोना संक्रमण पुष्टी भएको छ । गएराति मात्रै ३ सय ३३ जनामा नयाँ संक्रमण पुष्टी भएको छ । ट्रम्पले आउँदो हप्ता अमेरिकाका लागि निकै महत्वपूर्ण रहेको बताउंदै कोरोना भाइरस फैलिनबाट रोक्न डटेर सामना गर्ने प्रतिवद्धता जनाउनुभएको छ ।

राष्ट्रपति ट्रम्पले व्यक्तिगत सरसफाइमा ध्यान दिन सबै अमेरिकी नागरिकहरुलाई आग्रह गर्नुभएको छ । अनावश्यक रुपमा घर बाहिर ननिस्किन र जमघट नगर्न पनि उहाँले सुझाव दिनुभएको छ ।

अमेरिकाले युरोपेली देशबाट आउने–जाने सबै यात्रुवाहक जहाज एक महिनासम्मका लागि बन्द गरेको छ ।

युरोपेली देश इटलीमा कोरोना भाइरसका कारण एकै दिन २ सय ५० जनाको मृत्यु भएको छ । कोरोनाबाट एकै दिनमा मृत्यु भएको यो संख्या हालसम्मकै धेरै हो ।

यसैबीच विश्व स्वास्थ्य संगठनले कोरोना भाइरसको इपिसेन्टर चीनबाट युरोपेली देशमा सरेको जनाएको छ । संगठनले गए राति गरेको नियमित पत्रकार सम्मेलनमा कोभिड १९ का कारण चीनमा नियन्त्रण हुँदै गएपनि यूरोपसहित बाँकी विश्वमा भाइरसको महामारी गम्भीर बन्दै गएकोमा चिन्ता व्यक्त गरेको छ ।