काठमाडौं, ७ माघ । नेकपा एमाले र माओवादी केन्द्रको एकता संयोजन समितिको बैठकले राष्ट्रियसभा सदस्य निर्वाचनसम्बन्धी कार्यदलको प्रतिवेदन अनुमोदन गरेको छ । त्यस्तै बैठकले नयाँ सरकार बन्ना साथ समृद्धि र सुशासनको मार्गचित्र कार्यान्वयनमा लैजान अर्काे कार्यदल गठन गरेको छ ।

एमाले अध्यक्ष केपी शर्मा ओलीको बालकोटस्थित निवासमा आइतबार बसेको समिति बैठकले सुवास नेम्बाङ नेतृत्वको कार्यदलको राष्ट्रियसभा सदस्य निर्वाचनमा सिट बाँडफाँड सम्बन्धी प्रतिवेदन अनुमोदन गरेको हो ।

नेम्बाङ नेतृत्वको कार्यदलले राष्ट्रिय सभाका ५६ मध्ये ४३ सिटमा गठबन्धनले उम्मेदवारी दिने र यसमध्ये एमालेले २९ र माओवादीले १४ उम्मेदवार उठाउने तय गरेको थियो । सोहीअनुसार कार्यदलले प्रदेश सरकारका मुख्यमन्त्री, सभामुख र उपसभामुखमा कसरी जिम्मेवारी बाँडफाँड गर्ने भन्ने विषयमा छलफल गरिरहेको छ ।

समग्रमा एमालेले ४ र माओवादीले २ मुख्यमन्त्री लिने र सभामुखमा दुवै दलको निर्वाचित संख्या अनुसार मिलाएर लैजाने प्रस्ताव गरिएको छ । यसबारे भने संयोजन समितिले नै अन्तिम निर्णय गर्ने गरी प्रतिवेदन पेश भएको छ ।

बैठकले नयाँ सरकारले लिने समृद्धि र सुशासनसम्बन्धी कार्यक्रम तय गर्न कार्यदल गठन गरेको छ । कार्यदललाई नयाँ सरकार बन्नासाथ संयुक्त घोषणा पत्रमा उल्लेख भएका नीतिलाई कार्यक्रमम मुर्तरुप दिनका लागि एमाले उपाध्यक्ष बामदेव गौतमको नेतृत्वमा ७ सदस्यीय कार्यदल गठन गरिएको नेकपा माओवादी केन्द्र नेता नारायणकाजी श्रेष्ठले बताउनुभयो ।

कार्यदलमा गिरिराजमणि पोखरेल, भीम रावल, वर्षमान पुन, भीमबहादुर श्रेष्ठ, विजय पौडेल र युवराज खतिवडा रहेका छन् । पार्टी एकताका लागि बैचारिक र सांगठानिका विषयमा छलफल गरी निर्णय आउने नेकपा एमालेका नेता सुवास नेम्बाङले बताउनुभयो ।

एकीकृत पार्टीको शीर्ष नेतृत्व तथा मातहत कमिटीको सांगठानिक समायोजनका विषयमा दुई अध्यक्षबीच अझै एक चरण छलफल गरी पुन संयोजन समितिको बैठक बस्ने जनाइएको छ ।