काठमाडौं ५ चैत । परराष्ट्रमन्त्री नारायणकाजी श्रेष्ठले रुसी विदेश मन्त्रालयले रुसी सेनामा भएका नेपालीमध्ये घर फर्कन चाहनेको करार रद्द गर्ने सैद्धान्तिक सहमति दिएको जानकारी गराएका छन्।

‘रुसी विदेश मन्त्रालयले सेनामा भर्ना भएका नेपालीमध्ये घर फर्कन चाहनेलाई करार रद्द गर्न सहयोग गर्नेबारे आफ्नो सैद्धान्तिक सहमति रहेको जानकारी गराएको छ,’ सोमबारको प्रतिनिधि सभा बैठकमा उठेका प्रश्नको जवाफ दिने क्रममा श्रेष्ठले भने।

साथै, उनले त्यसको मोडालिटी तयार हुन बाँकी रहेको पनि बताए।

‘त्यसको मोडालिटी तयार हुन बाँकी छ,’ उनले भने।

रुस सरकारले मृतकका परिवारलाई क्षतिपूर्ति एवं बिमावापतको रकम उपलब्ध गराउने प्रक्रिया पनि अघि बढेको उनको भनाइ थियो।

‘रुस सरकारले मृतकका परिवारलाई क्षतिपूर्ति एवं बिमावापतको रकम उपलब्ध गराउने प्रक्रिया प्रारम्भ गरेको छ,’ उनले भने, ‘क्षतिपूर्तिको रकम कन्सुलर सेवा विभागमार्फत उपलब्ध हुनेछ।’

मस्कोस्थित नेपाली दूतावासले यसबारे काम गरिरहेको पनि उनले संसदलाई जानकारी गराएका छन्।