काठमाडौं २७ कात्तिक । भारतको उत्तरपूर्वी राज्य मणिपुरको जिरिबाम जिल्लामा अनिश्चितकालीन कर्फ्यु लगाइएको छ। सोमबार शंकास्पद अतिवादीसँग सुरक्षाकर्मीको भिडन्त भएपछि जिल्लामा कर्फ्यु लगाइएको हो।

मणिपुर प्रहरीले सामाजिक सञ्जालमा सोमबार दिउँसो करिब ३ बजे जिरिबामको जाकुराडोर र बोरोबेकरा पुलिस स्टेसननजिकै रहेको सीआरपीएफ क्याम्पलाई सशस्त्र चरमपन्थीहरूले निशाना बनाएको बताएको छ।

मणिपुर प्रहरीले घटनाबारे लेखेको छ( सशस्त्र चरमपन्थीहरूले जिरिबाम जिल्लाको जाकुराडोर क्षेत्रमा अवस्थित एक सीआरपीएफ चौकीमा हमला गरे। त्यसपछि सुरक्षा बलहरूले तुरुन्त जवाफी कारबाही गरे। यो मुठभेड करिब ४० मिनेटसम्म चल्यो र पछि १० सशस्त्र आतङ्ककारीको शव निकालियो।

प्रहरीका अनुसार भिडन्तमा एक सीआरपीएफ जवान सञ्जीव कुमारलाई गोली लागेको छ। हाल उनलाई असमको सिलचरको मेडिकल कलेजमा भर्ना गरिएको छ

समाचार एजेन्सी पीटीआईका अनुसार जिल्लामा शान्ति कायम गर्न कर्फ्यु लगाइएको हो।

मणिपुरमा लामो समयदेखि हिंसा जारी छ। हिंसामा धेरै जनाले ज्यान गुमाइसकेका छन् भने सम्पत्तिमा पनि ठूलो क्षति पुगेको छ।

यस विषमाय विपक्षी दलहरूले केन्द्र सरकारको कडा आलोचना गरिरहेको छ।