काठमाडौं २७ फागुन । भारतीय टेलिकम्युनिकेसन कम्पनी एयरटेलले भारतमा स्टारलिंक इन्टरनेटका लागि स्पेसएक्ससँग साझेदारीको घोषणा गरेको छ।
स्थानीय मिडियाहरुका अनुसार योसँगै अब उच्चगतिको अर्बपति इलोन मस्कको स्याटेलाइट इन्टरनेट भारतमा चल्नेछ। स्पेसएक्सले भारतमा स्टारलिंक बिक्रीका लागि हुनलागेको यो पहिलो सम्झौता भएको टाइम्स अफ इन्डियाले उल्लेख गरेको छ।
यो सम्झौताले एयरटेल र स्पेसएक्सलाई स्टारलिंक विस्तारको बाटो खुल्ला हुनेछ।
एयरटेलको प्रेस विज्ञप्तिअनुसार दुवै कम्पनीले एयरटेलका स्टोरहरुमा स्टारलिंकका उपकरण उपलब्ध गराउनेछन्। त्यसपछि व्यावसायिक ग्राहकसम्म एयरटेलका माध्यमबाट स्टारलिंकको सेवा सुरु हुनेछ।
यसले समुदाय, विद्यालय, स्वास्थ्यकेन्द्रहरुलाई जोड्ने एयरटेलले जनाएको छ। स्टारलिंकको उपस्थितिपछि भारतका दुर्गम ग्रामीण क्षेत्रमा समेत इन्टरनेटको पहुँच विस्तार हुनेछ।
दुई कम्पनीले अब एयरटेलको नेटवर्क विस्तार र अभिवृद्धि तथा एयरटेलको भूमिस्थ सञ्जाल पूर्वाधार र अन्य क्षमताबाट स्पेस एक्सले लिनसक्ने फाइदाको खोजी गर्नेछन्।
यसलाई कम्पनीले कोशेढुंगा भनेको छ। यसले विश्वस्तरीय उच्चगतिको ब्रोडब्यान्ड सुविधा गाउँ गाउँसम्म पुग्ने भारती एयरटेल लिमिटेडका प्रबन्धनिर्देशक गोपाल वित्तलले बताए।
स्पेसएक्सजस्तो प्रविधिमा विश्वकै नेतृत्व गरिरहेको कम्पनीसँग सहकार्य गर्न पाउँदा एयरटेलले खुसी व्यक्त गरेको छ।
प्रतिक्रिया दिनुहोस्