सुरुवाती दबाबमै अष्ट्रेलियाको आत्मघाती गोल
काठमाडौं (मैदान-सिएटल)- आयोजक राष्ट्र अमेरिकाले फिफा विश्वकप २०२६ मा प्रभावशाली प्रदर्शनलाई निरन्तरता दिँदै अष्ट्रेलियालाई २–० ले पराजित गरेको छ। लगातार दोस्रो जित निकालेसँगै अमेरिका एक खेल बाँकी रहँदै नकआउट चरणमा स्थान सुरक्षित गर्ने पहिलो टोलीहरूमध्ये एक बनेको छ।
सिएटल स्टेडियममा भएको समूह ‘डी’ को महत्वपूर्ण भिडन्तमा अमेरिकाले खेलको सुरुदेखि नै नियन्त्रण जमाएको थियो। पहिलो खेलमा विजय हासिल गरेका दुवै टोलीका लागि यो खेल समूहको शीर्ष स्थानतर्फको निर्णायक संघर्षका रूपमा हेरिएको थियो। तर मैदानमा अमेरिकाको गति, आक्रामकता र रणनीतिक अनुशासनअघि अष्ट्रेलिया निरीह देखियो।
सुरुवाती दबाबमै अष्ट्रेलियाको आत्मघाती गोल
खेलको १४औँ मिनेटमा अमेरिकाले अग्रता लियो। फोलारिन बालोगुनले बायाँ भागबाट तीव्र गतिमा अघि बढ्दै दिएको लो-क्रस अष्ट्रेलियाका रक्षक क्यामरुन बर्गेसले क्लियर गर्न खोज्दा आफ्नै पोस्टमा गोल हुन पुग्यो।
यो विश्वकपमा अमेरिकाले लगातार दोस्रो खेलमा विपक्षीको आत्मघाती गोलबाट अग्रता लिएको हो। गोलपछि अमेरिकी समर्थकहरूले स्टेडियमलाई उत्साहले भरिदिए।
अग्रता पाएपछि अमेरिकाले मिडफिल्डमा पकड झन् बलियो बनायो भने अष्ट्रेलिया दबाबमा पर्यो। मोहम्मद टुरे र म्याथ्यु लेकीले केही अवसर सिर्जना गरे पनि अमेरिकी रक्षापंक्ति मजबुत देखियो।
युवा स्टार एलेक्स फ्रिम्यान चम्किए
पहिलो हाफको अन्त्यतिर अमेरिकाले आफ्नो अग्रता दोब्बर बनायो। मालीक टिलम्यानले संघर्ष गरेर जितेको फ्रिकिकबाट सिर्जना भएको अवसरमा सर्जिनो डेस्टको प्रहार अष्ट्रेलियाका कप्तान ह्यारी साउटरमा लागेर फर्कियो।
रिबाउन्ड बलमा सबैभन्दा पहिले पुगेका २१ वर्षीय रक्षक एलेक्स फ्रिम्यान ले हेडमार्फत बल जाली चुमाउँदै अमेरिकालाई २–० को बलियो स्थितिमा पुर्याए।
सुरुमा अफसाइडको शंका गरिए पनि भिडियो समीक्षा पछि गोललाई मान्यता दिइयो। गोलसँगै फ्रिम्यान अमेरिकाका नयाँ उदीयमान नायकका रूपमा चर्चामा आए।
अमेरिकी प्रशिक्षक माउरिसियो पोचेटिनोले खेलपछि भने,
“फ्रिम्यानको विकास अद्भुत छ। उनी आफ्नो स्थानमा विश्वकै उत्कृष्ट खेलाडीमध्ये एक बन्ने क्षमता राख्छन्।”
दोस्रो हाफमा अष्ट्रेलियाको संघर्ष
पहिलो हाफ कमजोर खेलेपछि अष्ट्रेलियाका प्रशिक्षक टोनी पोपोभिचले दोस्रो हाफ सुरु हुनासाथ नेस्टोरी इरानकुन्डा र कोनर मेटकाल्फलाई मैदानमा उतारे।
दुवै खेलाडीले आक्रमणमा केही ऊर्जा थपे। इरानकुन्डाले दायाँ भागबाट लगातार दबाब सिर्जना गरे भने क्रिस्टियन भोल्पाटोले गोल गर्ने अवसर पनि पाए। तर अमेरिकी गोलरक्षक म्याट फ्रिज उत्कृष्ट लयमा देखिए।
अष्ट्रेलियाले बलमा बढी नियन्त्रण खोजे पनि निर्णायक क्षणमा फिनिसिङ कमजोर रह्यो।
सात पहेँलो कार्ड, चर्को प्रतिस्पर्धा
खेल निकै शारीरिक बन्यो। वेस्टन म्याकेनी, जोर्डन बोस, मालीक टिलम्यान लगायत खेलाडीहरूबीच पटक–पटक कडा टक्कर देखियो। कुल सात पहेँलो कार्ड बाँडिएको यो खेल हालसम्मकै सबैभन्दा कडा प्रतिस्पर्धामध्ये एक बन्यो।
अन्तिम समयमा रेफ्री फेलिक्स ज्वाएर आफैं सामान्य चोटग्रस्त हुँदा खेल केहीबेर रोकिएको थियो। तर उनले खेल पूरा गराए।
अमेरिकाको ऐतिहासिक उपलब्धि
यो जितसँगै अमेरिकाले विश्वकप इतिहासमा सन् १९३० पछि पहिलोपटक लगातार दुई खेल जित्दै प्रतियोगिता सुरु गर्ने उपलब्धि हासिल गरेको छ।
प्रशिक्षक पोचेटिनो भावुक हुँदै भने,
“म अमेरिकी होइन, तर आजको जितपछि भावुक भएँ। समर्थकहरूसँगको सम्बन्ध र यो टोलीको भावना विशेष छ।”
खेलका मुख्य तथ्यांक
- नतिजा: अमेरिका २–० अष्ट्रेलिया
- बल नियन्त्रण: अमेरिका ६०%, अष्ट्रेलिया ४०%
- अन टार्गेट प्रहार: अमेरिका २, अष्ट्रेलिया २
- कर्नर: अमेरिका ७, अष्ट्रेलिया ४
- पहेँलो कार्ड: ७
समूह ‘डी’ को अवस्था
यो जितपछि अमेरिका ६ अंकसहित नकआउट चरणमा प्रवेश गर्न सफल भएको छ। अष्ट्रेलियाले भने अन्तिम समूह खेलमा जित निकाल्नै पर्ने दबाब सामना गर्नेछ।
सिएटलमा अन्तिम सिटी बज्दा “यूएसए, यूएसए” को नारा घन्किरहेको थियो। घरेलु समर्थकको उत्साहबीच अमेरिका अब विश्वकपको उपाधि यात्रालाई अझ बलियो बनाउने लक्ष्यसहित नकआउट चरणतर्फ अघि बढेको छ।
प्रतिक्रिया दिनुहोस्