बुटवल,२७ चैत ।
संघीय सरकारले जारी गरेको ‘श्वेत पत्र’ का बिषयमा प्रतिपक्षको आलोचना भै रहेका बेला प्रदेश नंं ५ को मन्त्रिपरिषद वैठकले प्रदेश नंं ५ को समग्र स्थितिबारे ‘श्वेत पत्र’ जारी गर्ने भएको छ । यही २९ गतेको प्रदेश सभा वैठकमा प्रदेश सरकारले तयार पारेको  ‘श्वेत पत्र’ जारी गर्ने निर्णय गरेको छ ।
वैठकले गाउंसभा तथा नगरसभाको कानुन निर्माण प्रकृया सम्बन्धमा बनेको विधेयक र प्रदेशको सार्वजनिक लिखित प्रमाणीकरण कार्यविधि सम्बन्धमा बनेको विधेयक प्रदेश सभाको २९ गतेको वैठकमा पेश गर्ने निर्णय गरेको सरकारका प्रवक्ता एवं भौतिक पुर्वाधार विकास मन्त्री वैजनाथ चौधरीले जानकारी दिए । यस्तै आर्थिक मामिला तथा योजना मन्त्रालय अन्तर्गतको संचित कोष संचालन कार्यविधि २०७४लाई मन्त्रिपरिषद वैठकले पारित गरेको छ । केन्द्र सरकारले श्वेत पत्रका नाममा जारी गरेपनि प्रदेश सरकारले भने श्वेत पत्रलाई स्थिती पत्रको नाममा सम्बोधन गरेको छ । सरकारका प्रवक्ता चौधरीका अनुसार उक्त ‘स्थिति पत्र’ सातवटै प्रदेश मध्ये पहिलो हो । ‘स्थिति पत्र’मा प्रदेशको आर्थिक, सामाजिक, सांस्कृतिक, शैक्षिक लगायतका क्षेत्रको तथ्यांक संकलन गरिएको र संसदबाटै सार्वजनिक गरिने प्रवक्ता चौधरीले बताए ।
प्रारम्भिक अध्ययन अनुसार प्रदेश ५ मानव विकास सूचकांकका हिसाबले चौथो स्थानमा रहेको, प्रदेश ३ सबै सूचकांकमा एक नम्बरमा र त्यसपछि प्रदेश नंं १ र ४ रहेका पाइएको स्थितीपत्रमा उल्लेख गरिएको छ । प्रदेश ५ मा ४४ लाख ५८ हजार २ सय ५३ जनसंख्या रहेको छ ।