रसुवा । रसुवाको टिमुरे क्षेत्रमा ड्युटीमा खटिएको सशस्त्र प्रहरी बलको टोली सम्पर्कविहीन भएको छ। बाढीको अवस्था गम्भीर बनेका बेला टोलीसँग सञ्चार सम्पर्क हुन नसकेको हो।

सशस्त्र प्रहरी बलका अनुसार टिमुरे क्षेत्रमा सञ्चार सम्बन्ध विच्छेद भएकाले टोलीसँग सम्पर्क हुन नसकेको हो। सञ्चार सम्पर्क बन्द हुँदा घटनाको विस्तृत विवरण संकलन गर्नसमेत समस्या भइरहेको जनाइएको छ।

यसैबीच, सोही क्षेत्रमा ड्युटीमा खटिएका नेपाल प्रहरीका सात जना सुरक्षाकर्मी भने सम्पर्कमा आएका छन्। उनीहरूसँग सामान्य अवस्थामा कुराकानी भएको बताइएको छ।

विस्तृत विवरण आउन बाँकी

सशस्त्र प्रहरीका अनुसार टिमुरेमा खटिएको टोली अचानक सम्पर्कविहीन भएपछि उनीहरूको अवस्थाबारे थप जानकारी लिन प्रयास भइरहेको छ।

बाढीका कारण सञ्चार तथा आवागमन प्रभावित भएकाले टोलीको यकिन अवस्था तत्काल जानकारी हुन नसकेको बताइएको छ। सम्बन्धित सुरक्षा निकायले अवस्था बुझ्न र आवश्यक उद्धार तथा समन्वयका लागि प्रयास गरिरहेका छन्।

Originally published on abcnews.com.np.