काठमाडौं । भोटेकोशी नदीमा आएको भीषण बाढीले रसुवा क्षेत्रमा रहेका नेपाल विद्युत् प्राधिकरणअन्तर्गतका विभिन्न जलविद्युत् आयोजना तथा विद्युत् गृहमा ठूलो क्षति पुर्‍याएको छ। बाढी प्रभावित क्षेत्रमा कार्यरत कर्मचारीहरूको अवस्था समेत यकिन हुन नसकेको नेपाल विद्युत् प्राधिकरणले जनाएको छ।

प्रारम्भिक विवरणअनुसार बाढीले रसुवागढी, त्रिशूली–३ बी हब, त्रिशूली जलविद्युत् आयोजना, माथिल्लो त्रिशूली–३ ए तथा देवीघाटलगायतका विद्युत् गृह र संरचनामा व्यापक क्षति पुर्‍याएको छ।

तर बाढीको तीव्रता, सडक तथा सञ्चार सम्पर्कमा आएको अवरोधका कारण क्षतिको विस्तृत विवरण भने अझै प्राप्त हुन सकेको छैन।

कर्मचारीसँग सम्पर्कको प्रयास

बाढी प्रभावित क्षेत्रमा कार्यरत कर्मचारीहरूको अवस्थाबारे जानकारी लिन नेपाल विद्युत् प्राधिकरणले निरन्तर प्रयास गरिरहेको जनाएको छ। सञ्चार सम्पर्क र आवतजावतमा समस्या उत्पन्न भएपछि विभिन्न आयोजना तथा विद्युत् गृहमा रहेका कर्मचारीको अवस्था तत्काल यकिन हुन नसकेको हो।

प्राधिकरणले कर्मचारीसँग सम्पर्क स्थापित गर्ने र उनीहरूको सुरक्षा अवस्थाबारे जानकारी लिने प्रयास जारी राखेको जनाएको छ।

क्षति मूल्याङ्कनका लागि टोली परिचालनको तयारी

बाढी प्रभावित विद्युत् संरचनाको वास्तविक क्षति पत्ता लगाउन प्राधिकरणले प्राविधिक तथा अन्य आवश्यक टोली परिचालन गर्ने तयारी गरिरहेको छ।

सञ्चार सम्पर्क पुनःस्थापित भएपछि र प्रभावित क्षेत्रमा पुग्ने अवस्था बनेपछि मात्रै जलविद्युत् आयोजना, विद्युत् गृह तथा प्रसारणसम्बन्धी संरचनामा भएको वास्तविक क्षतिको पूर्ण विवरण प्राप्त हुने जनाइएको छ।

रसुवाको भोटेकोशी क्षेत्रमा आएको भीषण बाढीले बस्ती, बजार, भन्सार क्षेत्र, सडक–पुल, सुरक्षा निकायका संरचना र अब विद्युत् उत्पादनसम्बन्धी पूर्वाधारमा समेत गम्भीर असर पारेको प्रारम्भिक विवरण आइरहेका छन्। क्षतिको पूर्ण विवरण र कर्मचारीहरूको अवस्थाबारे थप जानकारी आउन बाँकी छ।

Originally published on abcnews.com.np.