काठमाडौं । रसुवाको भोटेकोशी नदीमा आएको भीषण बाढीको कारण तिब्बत क्षेत्रमा गएको हिमपहिरो हुनसक्ने प्रारम्भिक अनुमान गरिएको छ।

जलवायुविज्ञ धर्मराज उप्रेतीका अनुसार हिमपहिरोका कारण नदी थुनिएर अस्थायी प्राकृतिक बाँध बनेको र पछि उक्त बाँध फुट्दा ठूलो परिमाणमा पानी एकैपटक तलतर्फ बगेको हुनसक्ने प्रारम्भिक अनुमान छ।

‘हिमपहिरो गएर ड्याम बनाएको र पछि त्यो फुट्दा ठूलो परिमाणमा पानी एकैपटक बग्दा बाढी आएको प्रारम्भिक अनुमान छ,’ उप्रेतीले बताएका छन्।

उनका अनुसार बाढीको वास्तविक कारणबारे अध्ययन जारी छ र अहिले नै यसलाई अन्तिम निष्कर्षका रूपमा लिन सकिने अवस्था छैन।

चीनबाट आयो एसएमएस

उप्रेतीले चीनबाट बाढीसँग सम्बन्धित एउटा एसएमएस प्राप्त भएको जानकारी पनि दिएका छन्। उक्त सन्देशमा रहेको विवरणको अध्ययन भइरहेको र त्यसबाट बाढीको वास्तविक स्रोत तथा कारणबारे थप जानकारी प्राप्त हुन सक्ने उनले बताएका छन्।

‘हामीलाई चीनबाट एउटा एसएमएस आएको छ,’ उनले भने, ‘उक्त एसएमएसबारे हामी अध्ययन गरिरहेका छौँ। यसबारे केही समयपछि जानकारी दिने छौँ।’

रसुवाको टिमुरे, स्याफ्रुबेँसी र रसुवागढीलगायत क्षेत्रमा आएको बाढीले बस्ती, बजार, भन्सार, सडक–पुल, सुरक्षा निकायका संरचना तथा जलविद्युत् आयोजनामा ठूलो क्षति पुर्‍याएको प्रारम्भिक विवरण आइरहेका छन्। बाढीको वास्तविक कारण र क्षतिको विस्तृत विवरण भने अझै आउन बाँकी छ।

Originally published on abcnews.com.np.