इटहरी, साउन १७ गते — सुनसरीको देवानगञ्जमा भएको घटनाको प्रभाव क्रमशः कम हुँदै गएको छ। जिल्लाको शान्ति–सुरक्षा अवस्था सुधारोन्मुख देखिएकाले कर्फ्यु हटाइए पनि देवानगञ्ज, हरिनगर, कोशी र भोक्राहा नरसिंह गाउँपालिकामा निषेधाज्ञा भने कायम राखिएको छ।
जिल्ला प्रशासन कार्यालय सुनसरीले सुरक्षा संवेदनशीलतालाई मध्यनजर गर्दै स्थानीय प्रशासन ऐन, २०२८ को दफा ६ को उपदफा ३ (क) बमोजिम साउन १७ गते साँझ ७ बजेदेखि साउन १८ गते सोमबार बिहान १० बजेसम्म चारवटै गाउँपालिकाको सम्पूर्ण क्षेत्रमा निषेधाज्ञा लागू गर्ने निर्णय गरेको प्रमुख जिल्ला अधिकारी ईश्वरीप्रसाद अर्यालले जानकारी दिए।
निषेधाज्ञाको अवधिभर पाँच जनाभन्दा बढी व्यक्ति भेला हुन, सभा, जुलुस, प्रदर्शन तथा धर्ना गर्न पूर्ण रूपमा रोक लगाइएको छ।
दक्षिणी सुनसरीमा केही दिन तनावग्रस्त बनेको जनजीवन अहिले क्रमशः सामान्य बन्दै गएको छ। बजार, यातायात र व्यापार–व्यवसाय सञ्चालन हुन थालेका छन्। मृतकहरूको दाहसंस्कार सम्पन्न हुनु, पीडित परिवारसँग सरकारी सहमति, सुरक्षा निकायको प्रभावकारी परिचालन तथा राजनीतिक दल, नागरिक समाज र धार्मिक समुदायबीच भएको संवाले वातावरणलाई सहज बनाउन महत्त्वपूर्ण योगदान पु¥याएको स्थानीयवासीले बताएका छन्।
प्रशासनले सामाजिक सद्भाव, धार्मिक सहिष्णुता र सार्वजनिक शान्ति कायम राख्न सबै पक्षलाई संयमित हुन आग्रह गरेको छ। साथै कुनै पनि अफवाहमा नफसी आपसी विश्वास र सहकार्यबाट शान्तिपूर्ण वातावरण कायम राख्न सर्वसाधारणसँग अपिल गरेको छ।
Originally published on abcnews.com.np.
प्रतिक्रिया दिनुहोस्