काठमाडौं ३२ असार । कोसी प्रदेश सरकारमा निरन्तर रहने कि सरकारबाट बाहिरिने भन्ने विषयमा निर्णय गर्न नेपाली कांग्रेसको कोसी प्रदेश कार्यदलको आकस्मिक बैठक विराटनगरमा सुरु भएको छ।

नेकपा (एमाले) र नेपाली कांग्रेसबीचको सत्ता साझेदारी संकटमा परेपछि प्रदेश सरकारको भावी रणनीति तय गर्न बैठक बोलाइएको हो। सुदूरपश्चिम र कर्णाली प्रदेशमा विकसित नयाँ राजनीतिक समीकरणको प्रभाव कोसी प्रदेशमा पनि देखिन थालेपछि सत्ता साझेदार दलबीच तिक्तता बढेको छ।

केन्द्रबाट सरकारका विषयमा औपचारिक निर्देशन नआए पनि प्रदेशको पछिल्लो राजनीतिक अवस्थालाई ध्यानमा राख्दै कांग्रेसले बैठक आह्वान गरेको जनाएको छ। बैठकले कोसी प्रदेश सरकारमा कांग्रेसको निरन्तरता कायम राख्ने वा सरकारबाट बाहिरिने भन्ने विषयमा स्पष्ट निर्णय गर्ने अपेक्षा गरिएको छ।

बैठकमा कांग्रेस कोसी प्रदेश संसदीय दलका नेता उद्धव थापा, उपनेता हिमाल कार्की, प्रमुख सचेतक गोपाल तामाङ, सचेतक मैयाँ श्रेष्ठ, ज्येष्ठ सदस्य गयानन्द मण्डल, महामन्त्री उमेश थापा तथा नेता अमृत अर्याल सहभागी छन्।

यद्यपि, कांग्रेसको तर्फबाट कोसी प्रदेश सरकारको नेतृत्व गरिरहेका भौतिक पूर्वाधार विकासमन्त्री प्रदीपकुमार सुनुवार भने बैठकमा सहभागी भएका छैनन्। उनले बैठकमा सरकारका विषयमा नभई अन्य विषयमा छलफल हुने प्रतिक्रिया दिएका छन्।

पार्टीभित्र सरकारको भविष्यबारे गम्भीर छलफल भइरहेका बेला सरकारमा सहभागी मन्त्रीहरू तत्काल सत्ता नछाड्ने पक्षमा देखिएका छन्। यसले पार्टी संगठन र सरकारमा रहेका मन्त्रीहरूबीच मतभेद देखिएको छ।

हाल कोसी प्रदेश सरकारमा कांग्रेसका तर्फबाट भौतिक पूर्वाधार विकासमन्त्री प्रदीपकुमार सुनुवार, उद्योग, कृषि तथा सहकारीमन्त्री इस्राइल मन्सुरी, स्वास्थ्यमन्त्री मानबहादुर लिम्बू, पर्यटन, वन तथा वातावरणमन्त्री भीम पराजुली तथा भौतिक पूर्वाधार राज्यमन्त्री शोभा चेम्जोङ सहभागी छन्।

आजको बैठकबाट हुने निर्णयले एमाले नेतृत्वको कोसी प्रदेश सरकारको भविष्य मात्र होइन, प्रदेशमा नयाँ राजनीतिक समीकरण बन्ने सम्भावनालाई समेत प्रभावित पार्न सक्ने राजनीतिक वृत्तको आकलन छ।