काठमाडौँ, साउन १८ गते — नयाँ सरकार गठन भएपछि पहिलो पटक राष्ट्रिय सभामा दुई वटा नयाँ विधेयक दर्ता भएका छन् । साउन १४ गते दर्ता भएका यी विधेयकसँगै लामो समयदेखिको ‘बिजनेस’ अभावको समस्या केही समयका लागि हटेको छ ।
संसद् सचिवालयका अनुसार कृषि, वन तथा पर्यावरणमन्त्री गीता चौधरीले ‘सङ्क्रामक पशुरोग (नियन्त्रण) विधेयक, २०८३’ र संस्कृति, पर्यटन तथा नागरिक उड्डयनमन्त्री खडकराज पौडेलले ‘आन्तरिक वायुसेवाको दायित्वसम्बन्धी विधेयक, २०८३’ दर्ता गराउनुभएको हो ।
किन ढिलाइ भयो ?
रास्वपाका वरिष्ठ नेता वालेन्द्र शाह गत चैत १३ गते प्रधानमन्त्री नियुक्त हुनुभएपछि चैत १९ गते संसद्को दुवै सदनको बैठक बसेको थियो । त्यसयता राष्ट्रिय सभामा एउटै विधेयक दर्ता भएको थिएन । यस अवधिमा प्रतिनिधि सभामा भने करिब १२ वटा विधेयक दर्ता भएका छन् ।
राष्ट्रिय सभाका सचिव तुलबहादुर कँडेलका अनुसार राजनीतिक विषयवस्तु समेटिएका विधेयक तत्काल दर्ता नगर्ने सरकारको सोचका कारण विधेयक आउन ढिलाइ भएको हो । अध्यादेश प्रतिस्थापनसम्बन्धी विधेयक निर्णयार्थ प्रस्तुत हुन नसकेको अवस्थाले पनि यस्तो बुझाइलाई बल पुगेको देखिन्छ ।
अध्यादेश प्रतिस्थापनको अवरोध
सरकार गठन लगत्तै राष्ट्रपतिबाट आठ वटा अध्यादेश जारी भएका थिए । जसमध्ये चार वटाको प्रतिस्थापन विधेयक दुवै सदनबाट पारित भइसकेका छन् । तर राष्ट्रिय सभामा बहुमतमा रहेको नेपाली कांग्रेस र नेपाली कम्युनिस्ट पार्टीले बाँकी चार वटा अध्यादेश प्रतिस्थापन विधेयकमा सहयोग नगर्ने भएपछि ती निर्णयार्थ प्रस्तुत हुन सकेनन् ।
राष्ट्रिय सभाको भूमिका
विधायन व्यवस्थापन समितिका सभापति कृष्णबहादुर रोकायले राष्ट्रिय सभा कानुन निर्माणमा बाधक छ भन्ने बुझाइले पनि विधेयक आउन ढिला भएको टिप्पणी गर्नुभयो । तर उहाँले भन्नुभयो, “हामीले व्यवहारले नै चिरियौँ । चार वटा विधेयकको प्रतिवेदन एकै दिनमा संशोधनसहित पारित गरायौँ । यसले माथिल्लो सदनले सरकारलाई सहयोग गरेको बुझाइ भएको आधारमा विधेयक आएको हुन सक्छ ।”
सचिव कँडेलका अनुसार साउन २१ गतेको बैठकमा दर्ता भएका दुई वटामध्ये एउटा विधेयक प्रस्तुत हुने र सोही दिन सैद्धान्तिक छलफल हुने जनाइएको छ । अर्को विधेयक भने त्यसपछिको बैठकमा प्रस्तुत गरिनेछ ।
विधायन समितिका सभापति रोकायले सभामा विधेयक दर्ता भएपछि कम्तीमा एक महिनासम्म ‘बिजनेस’ को अभाव नहुने र प्रतिनिधि सभाबाट पनि थप विधेयक आउने भएकाले कानुन निर्माण प्रक्रियाको गति बढ्ने विश्वास व्यक्त गर्नुभयो ।
Originally published on abcnews.com.np.
प्रतिक्रिया दिनुहोस्