काठमाडौं । मेटाको स्वामित्वमा रहेको लोकप्रिय म्यासेजिङ एप ह्वाट्सएप का भारतसहित विभिन्न देशका धेरै प्रयोगकर्ताका एकाउन्ट सोमबार अचानक समीक्षा प्रक्रियामा परेका छन्। कुनै पूर्वसूचना बिना एकाउन्ट बन्द भएपछि प्रयोगकर्ताले सामाजिक सञ्जालमार्फत गुनासो गरेका छन्।

रिपोर्टअनुसार समस्या सोमबार राति करिब ८ बजे देखि देखिन थालेको हो। एप खोल्नेबित्तिकै प्रभावित प्रयोगकर्ताले “तपाईंको एकाउन्ट समीक्षामा छ” भन्ने सन्देश देखेका थिए।

ह्वाट्सएपले देखाएको सूचनामा एकाउन्टका गतिविधि र प्रयोग गरिएको डिभाइसको जानकारी सेवाका सर्तअनुसार भए–नभएको जाँच भइरहेको उल्लेख गर्दै सामान्यतया २४ घण्टाभित्र समीक्षा पूरा हुने जानकारी दिएको छ।

कम्पनीका अनुसार प्रभावित एकाउन्टहरू समीक्षा प्रक्रियामा रहेका छन् र समीक्षा सकिएपछि सम्बन्धित प्रयोगकर्तालाई नतिजाबारे जानकारी गराइनेछ।

यस विषयमा ह्वाट्सएपका प्रवक्ताले सेवाको दुरुपयोग रोक्न कम्पनीले शंकास्पद गतिविधि भएका एकाउन्टमाथि नियमित निगरानी र कारबाही गर्ने गरेको बताएका छन्।

प्रवक्ताले कहिलेकाहीँ प्रणालीगत त्रुटिका कारण वास्तविक प्रयोगकर्ता पनि प्रभावित हुन सक्ने स्वीकार गर्दै त्यस्तो अवस्था आएमा समस्या छिटो समाधान गरी प्रयोगकर्तालाई पुनः सेवा उपलब्ध गराउने प्रयास भइरहेको बताएका छन्।

Originally published on abcnews.com.np.