पोखरा । पोखरा महानगरपालिका–९ स्थित बसपार्क क्षेत्रका सुकुम्बासी तथा अव्यवस्थित बसोबासीको अन्तिम नामावली आगामी साउन २२ गते सार्वजनिक गरिने भएको छ।

महानगरपालिकाका अनुसार बसपार्क क्षेत्रमा बसोबास गर्दै आएका सुकुम्बासी तथा अव्यवस्थित बसोबासीका निवेदन र कागजातको छानबिन तथा स्थलगत निरीक्षणपछि साउन २ गते प्रारम्भिक नामावली प्रकाशित गरिएको थियो।

प्रकाशित नामावलीमाथि दाबी–विरोध दर्ता गर्ने अवधिमा १४६ वटा निवेदन प्राप्त भएको महानगरले जनाएको छ। प्राप्त निवेदनहरूको अध्ययन तथा भूमिहीन एवं अव्यवस्थित बसोबासी सरोकार सहजीकरण समिति र अन्य सम्बन्धित पक्षसँग आवश्यक छलफल भइरहेको छ।

यसअघि साउन १८ गते अन्तिम नामावली सार्वजनिक गर्ने तयारी भए पनि विवरण अध्यावधिक गर्ने काम बाँकी रहेकाले म्याद थप गरी साउन २२ गते अन्तिम सूची प्रकाशन गर्ने निर्णय गरिएको पोखरा महानगरपालिकाले जनाएको छ।

Originally published on abcnews.com.np.