हेटौँडा । वाग्मती प्रदेश सरकारमा सत्ता समीकरण फेरि एकपटक हलचलपूर्ण बनेको छ ।

भौतिक पूर्वाधार विकासमन्त्री बिनु रायमाझी पौडेलले मंगलबार मन्त्री पदबाट राजीनामा दिएकी छन् । मन्त्री पौडेलले नेपालको संविधानको धारा १६९ को उपधारा (२) को खण्ड (क) बमोजिम राजीनामा बुझाएको जनाइएको छ ।

रायमाझीको राजीनामापछि मुख्यमन्त्री इन्द्रबहादुर बानियाँले मन्त्रिपरिषद्को पुनर्संरचना गरेका छन् । मुख्यमन्त्री बानियाँले हाम्रो नेपाली पार्टी (हानेपा)का प्रदेशसभा सदस्य शैलेन्द्रमान बज्राचार्यलाई भौतिक पूर्वाधार विकासमन्त्री नियुक्त गरेका छन् ।

नयाँ कार्यविभाजनअनुसार मुख्यमन्त्री बानियाँले मुख्यमन्त्री तथा मन्त्रिपरिषद् कार्यालयको जिम्मेवारी आफैँ सम्हाल्ने भएका छन् । शिवराज अधिकारीलाई आन्तरिक मामिला, कानुन तथा सहकारी मन्त्रालय, उर्मिला नेपाललाई कृषि, पशुपन्छी, वन तथा वातावरण मन्त्रालय, कञ्चनचन्द्र बादेलाई स्वास्थ्य तथा सामाजिक विकास मन्त्रालयको जिम्मेवारी दिइएको छ ।

यसैगरी प्रभात तामाङ आर्थिक मामिला तथा योजनामन्त्री, सुरेश श्रेष्ठ उद्योग, पर्यटन, श्रम तथा यातायातमन्त्री, कृष्णकुमार तामाङ खानेपानी, ऊर्जा तथा सिँचाइमन्त्री तथा शैलेन्द्रमान बज्राचार्य भौतिक पूर्वाधार विकासमन्त्री भएका छन् ।

मुख्यमन्त्री बानियाँले मन्त्रिपरिषद्को कार्यसम्पादनलाई थप प्रभावकारी, समन्वयात्मक र परिणाममुखी बनाउन मन्त्रालयहरूको पुनर्संरचना गरिएको बताएका छन् ।

अल्पमतको दबाब र गठबन्धन व्यवस्थापनको चुनौतीबीच मुख्यमन्त्री बानियाँले गरेको यो पुनर्गठनले वाग्मतीको आगामी राजनीतिक दिशा र सरकारको स्थायित्वबारे थप चासो बढाएको छ ।

Originally published on abcnews.com.np.