काठमाडौं । नबिल बैंकले आर्थिक वर्ष २०८२/८३ को अपरिष्कृत वित्तीय विवरण सार्वजनिक गर्दै खुद नाफामा ३३.५० प्रतिशतको उल्लेखनीय वृद्धि भएको जनाएको छ। बैंकले गत आर्थिक वर्षमा ७ अर्ब ९० करोड ५७ लाख रुपैयाँ खुद नाफा कमाएको छ, जबकि अघिल्लो आर्थिक वर्षमा यो रकम ५ अर्ब ९२ करोड २१ लाख रुपैयाँ थियो।

बैंकको वित्तीय विवरणअनुसार कर्जा लगानी र निक्षेप दुवैमा दोहोरो अंकको वृद्धि भए पनि स्प्रेड दर घटेकाले खुद ब्याज आम्दानी अपेक्षाअनुसार बढ्न सकेन। अघिल्लो वर्ष १६ अर्ब ३२ करोड ७२ लाख रुपैयाँ रहेको खुद ब्याज आम्दानी बढेर १७ अर्ब ९२ लाख रुपैयाँ पुगेको छ। यस अवधिमा बैंकको स्प्रेड दर ३.५७ प्रतिशतबाट घटेर ३.१८ प्रतिशतमा झरेको छ। खुद फी तथा कमिसन आम्दानी पनि सामान्य वृद्धि हुँदै ३ अर्ब ५४ करोड १० लाख रुपैयाँ पुगेको छ।

बैंकको नाफामा सुधार हुनुको प्रमुख कारण भने निष्क्रिय कर्जामा आएको कमी र कर्जा नोक्सानी व्यवस्थामा भएको उल्लेखनीय गिरावट हो। अघिल्लो वर्ष ४ अर्ब २० करोड १४ लाख रुपैयाँ रहेको कर्जा नोक्सानी व्यवस्था घटेर २ अर्ब ६७ करोड ७१ लाख रुपैयाँमा सीमित भएको छ। निष्क्रिय कर्जा अनुपात ४.४८ प्रतिशतबाट घटेर ४.२० प्रतिशतमा झरेको छ भने खुद निष्क्रिय कर्जा ०.५८ प्रतिशत रहेको बैंकले जनाएको छ। बैंकले निष्क्रिय कर्जाको ११९.७३ प्रतिशत बराबर कर्जा नोक्सानी व्यवस्था गरेको छ।

नाफा वृद्धि भएसँगै सेयरधनीका लागि वितरणयोग्य नाफा पनि बढेको छ। बैंकको वितरणयोग्य नाफा ५ अर्ब १६ करोड ९१ लाख रुपैयाँ पुगेको छ भने लाभांश क्षमता १९.१० प्रतिशत पुगेको छ। अघिल्लो वर्ष यो क्षमता १४.२५ प्रतिशत थियो। बैंकले गत वर्ष जारी गरेको ५ अर्ब रुपैयाँ बराबरको पर्पेचुअल नन–क्युमुलेटिभ अग्राधिकार सेयरका लागि २३ करोड ३४ लाख २५ हजार रुपैयाँ लाभांश छुट्याएको छ।

अन्य वित्तीय सूचकमा प्रतिसेयर आम्दानी २१ रुपैयाँ ८९ पैसाबाट बढेर २८ रुपैयाँ ३६ पैसा पुगेको छ। प्रतिसेयर नेटवर्थ २४७ रुपैयाँ २८ पैसा र मूल्य–आम्दानी अनुपात १८.८६ गुणा रहेको छ।

बैंकको निक्षेप संकलन १२.९५ प्रतिशतले बढेर ५ खर्ब ९२ अर्ब ५५ करोड रुपैयाँ पुगेको छ भने कर्जा प्रवाह १२ प्रतिशतले वृद्धि भएर ४ खर्ब ६० अर्ब ३१ करोड रुपैयाँ पुगेको छ। यस अवधिमा बैंकको आधार दर ५.८३ प्रतिशतबाट घटेर ४.४४ प्रतिशतमा झरेको छ।

पुँजीगत आधार थप सुदृढ बनाउन बैंकले यसै वर्ष ५ अर्ब रुपैयाँ बराबरको ‘नबिल ८ प्रतिशत अग्राधिकार सेयर’ जारी गरेको छ। बैंकको पूँजीकोष अनुपात १२.३७ प्रतिशत र प्राथमिक पूँजीकोष अनुपात ९.६८ प्रतिशत रहेको वित्तीय विवरणमा उल्लेख छ।

Originally published on abcnews.com.np.