काठमाडौं — कोसी प्रदेश सरकारको नेतृत्वबारे केही दिनदेखि जारी अन्योल अन्ततः टुंगिएको छ। नेकपा (एमाले) का सचिव तथा कोसी प्रदेशका मुख्यमन्त्री हिक्मत कार्कीले नै सरकारको नेतृत्वलाई निरन्तरता दिने भएका छन्।
बुधबार पार्टी अध्यक्ष तथा प्रधानमन्त्री केपी शर्मा ओलीको निवासमा मुख्यमन्त्री कार्की, एमाले कोसी प्रदेश अध्यक्ष घनश्याम खतिवडा र पार्टी सचिव राजकुमार भण्डारीबीच भएको छलफलपछि कार्कीकै नेतृत्वमा सरकार अघि बढाउने सहमति बनेको हो।
छलफलमा अध्यक्ष ओलीले तत्काल नेतृत्व परिवर्तन नगर्ने संकेत दिए पनि भविष्यमा पार्टीले आवश्यक ठानेको अवस्थामा मुख्यमन्त्रीसहित सरकारमा रहेका सबै मन्त्रीहरूले निर्देशनअनुसार पद छाड्नुपर्ने सर्त राखेका छन्।
प्रदेश अध्यक्ष घनश्याम खतिवडाका अनुसार अहिले गठबन्धनलाई कायम राख्दै कार्कीकै नेतृत्वमा सरकार सञ्चालन गर्ने निर्णय भएको छ।
“यसैगरी चल्दै जाने, अध्यक्षले उपयुक्त वातावरण जतिखेर देख्नुहुन्छ, त्यतिबेला सबैले निर्देशन मान्नुपर्ने, बस्नुपरे बस्ने र छोड्नुपरे छोड्ने निष्कर्षमा पुगियो,” खतिवडाले बैठकपछि बताए।
उनले अहिलेका लागि गठबन्धनलाई व्यवस्थित गर्दै कार्कीकै नेतृत्वमा प्रदेश सरकार अघि बढ्ने सहमति भएको पनि जानकारी दिए।
“अहिले गठबन्धन मिलाएर उहाँकै नेतृत्वमा जाने। अध्यक्षले छोड्नू भनेका बेला मुख्यमन्त्री, मन्त्री सबैले छोड्ने सहमति भएको छ,” उनले भने।
नेतृत्व परिवर्तनको प्रयास असफल
एमालेभित्र कोसी प्रदेशको नेतृत्व परिवर्तनलाई लिएर केही दिनयता तीव्र विवाद चलिरहेको थियो। अध्यक्ष ओलीले मुख्यमन्त्री हिक्मत कार्कीको स्थानमा तिलकुमार मेन्याङ्बोलाई मुख्यमन्त्री बनाउन चाहेको चर्चा थियो।
त्यसका लागि अध्यक्ष ओलीले पार्टी सचिव शेरधन राईलाई कार्कीसँग राजीनामा गराउन जिम्मेवारीसमेत दिएको बताइएको थियो। मेन्याङ्बोको पक्षमा हस्ताक्षर अभियानसमेत सञ्चालन गरिएको थियो।
तर मुख्यमन्त्री कार्कीले राजीनामा दिन अस्वीकार गरेपछि विवाद झन् चर्किएको थियो। कार्कीसहित प्रदेशका प्रभावशाली नेताहरूले वर्तमान सरकारलाई निरन्तरता दिनुपर्ने अडान लिएपछि पार्टी नेतृत्वले तत्काल नेतृत्व परिवर्तनको योजना अघि बढाउन नसकेको स्रोतको दाबी छ।
विवाद समाधानका लागि अध्यक्ष ओलीले कोसी प्रदेशका शीर्ष नेताहरूलाई काठमाडौं बोलाएर छलफल गरेका थिए। सोही छलफलपछि तत्कालका लागि हिक्मत कार्कीकै नेतृत्वमा सरकारलाई निरन्तरता दिने सहमति बनेको हो।
Originally published on abcnews.com.np.
प्रतिक्रिया दिनुहोस्