काठमाडौं । ज्योति विकास बैंक लिमिटेडले राष्ट्रिय भुक्तानी प्रणालीअन्तर्गत ‘नेपालपे’ कार्ड सेवा सञ्चालनका लागि नेपाल क्लियरिङ हाउस लिमिटेड (एनसीएचएल) सँग सम्झौता गरेको छ ।

सम्झौतापत्रमा ज्योति विकास बैंकका प्रमुख कार्यकारी अधिकृत कपिल ढकाल र एनसीएचएलका प्रमुख कार्यकारी अधिकृत नीलेशमान सिंह प्रधानले हस्ताक्षर गरेका हुन् ।

सम्झौताअनुसार बैंकले आफ्ना ग्राहकलाई ‘नेपालपे’ कार्ड जारी गर्न सक्नेछ । साथै, अन्तर्राष्ट्रिय कार्ड सञ्जालअन्तर्गतका कार्ड तथा ‘नेपालपे’ कार्डका कारोबारसमेत एउटै प्रणालीमार्फत प्रशोधन गर्न सकिने व्यवस्था हुनेछ ।

एनसीएचएलका अनुसार ‘नेपालपे’ कार्डको व्यावसायिक विस्तारसँगै अब यो कार्ड नेपालभित्र मात्र नभई विदेशमा रहेका एटीएम र पीओएस मेसिनमार्फत पनि प्रयोग गर्न सकिनेछ ।

हाल एनसीएचएलको विद्युतीय कोष स्थानान्तरण प्रणालीमार्फत ११ वटा बैंक तथा वित्तीय संस्थाले विभिन्न अन्तर्राष्ट्रिय कार्डका कारोबार प्रशोधन गरिरहेका छन् । राष्ट्रिय भुक्तानी प्रणालीसँग एकीकरण भएपछि ‘नेपालपे’ कार्डका कारोबार पनि यही प्रणालीबाट सञ्चालन हुनेछन् ।

एनसीएचएलका अनुसार हालसम्म ३६ भन्दा बढी बैंक तथा वित्तीय संस्था ‘नेपालपे’ प्रणालीमा आबद्ध भएका छन् । तीमध्ये ८ संस्थाले ‘नेपालपे’ कार्ड जारी गरिसकेका छन् भने ११ भन्दा बढी संस्थाले कार्ड स्वीकार गर्ने सेवा सञ्चालनमा ल्याएका छन् ।

ज्योति विकास बैंकले हाल १० लाखभन्दा बढी ग्राहकलाई सेवा दिँदै आएको जनाएको छ । बैंकले देशभर १२१ शाखा, दुई विस्तारित सेवा कक्ष र ७५ वटा एटीएममार्फत सेवा प्रदान गर्दै डिजिटल बैंकिङ सेवाको विस्तारलाई निरन्तर तीव्र बनाइरहेको जनाएको छ ।

Originally published on abcnews.com.np.