काठमाडौं । जीवन बीमालेखको अवधि पूरा नहुँदै बीमितले बीमालेख समर्पण गर्दा बीमितसँगै बीमकलाई समेत आर्थिक क्षति हुने गरेको छ। बीमा अवधि पूरा हुनुअघि बीमालेख बन्द गर्दा बीमकले अभिकर्ता कमिसन, नियामकीय दस्तुर र व्यवस्थापन खर्चलगायतका लागत कटाएर भुक्तानी गर्नुपर्ने भएकाले बीमितले अपेक्षाकृत कम रकम पाउने अवस्था आउँछ।

बीमालेख समयअगावै समर्पण हुने क्रम घटाउन बीमक तथा अभिकर्ताले ग्राहकको आवश्यकता बुझेर उपयुक्त बीमालेख बिक्री गर्ने, पारदर्शी जानकारी दिने र नियमित सम्पर्कमा रहने रणनीति अपनाउनुपर्ने देखिएको छ।

ग्राहकको आवश्यकता बुझ्नुपर्ने

बीमितलाई बीमालेखका फाइदा, सर्त तथा दीर्घकालीन मूल्यबारे सरल र स्पष्ट जानकारी दिनुपर्ने हुन्छ। ग्राहकको जीवन अवस्था र वित्तीय लक्ष्यअनुसार उपयुक्त बीमालेख छनोट गर्न सहयोग गरेमा अनावश्यक रूपमा बीमा खरिद गर्ने प्रवृत्ति घटाउन सकिन्छ।

बीमितका गुनासा तथा समस्यालाई पनि छिटो र प्रभावकारी रूपमा सम्बोधन गर्न आवश्यक हुन्छ।

नियमित सञ्चार र सेवा

बीमाशुल्क भुक्तानीको मिति, बीमालेखका फाइदा, अवधि तथा अन्य आवश्यक विवरणबारे एसएमएस वा इमेलमार्फत नियमित जानकारी दिन सकिन्छ। ग्राहकको बदलिँदो आर्थिक तथा पारिवारिक अवस्थाअनुसार बीमालेखको आवधिक समीक्षा गर्ने व्यवस्था पनि उपयोगी हुन सक्छ।

त्यस्तै, ग्राहकका जिज्ञासा तत्काल सम्बोधन गर्न सहज ग्राहक सेवा प्रणाली विकास गर्नुपर्ने देखिएको छ।

पारदर्शिताबाट विश्वास बढाउनुपर्ने

बीमालेखका दस्तावेज र सर्तहरू बुझ्न सजिलो हुने गरी प्रस्तुत गर्नुपर्ने हुन्छ। दाबी प्रक्रियालाई सरल, पारदर्शी र छिटो बनाउँदा बीमितको विश्वास बढ्न सक्छ।

ग्राहकको वास्तविक आवश्यकता नबुझी जबरजस्ती बीमालेख बिक्री गर्ने प्रवृत्तिलाई पनि निरुत्साहित गर्नुपर्ने देखिन्छ।

बीमाशुल्क भुक्तानीमा लचकता

बीमाशुल्क भुक्तानीका विभिन्न विकल्प तथा उपलब्ध मोहलत अवधिबारे ग्राहकलाई स्पष्ट जानकारी दिनुपर्ने हुन्छ। जीवनमा आउने परिवर्तनअनुसार बीमालेख परिमार्जन गर्ने सुविधा तथा छोटो अवधिको आर्थिक समस्यामा बीमालेख अस्थायी रूपमा स्थगन गर्न सकिने व्यवस्था भए बीमालेख समर्पण घटाउन सहयोग पुग्न सक्छ। यस्ता सुविधा नेपाली बीमा बजारमा हाल उपलब्ध नरहेको बताइएको छ।

निरन्तरताका लागि प्रोत्साहन

लामो समयसम्म बीमालेख कायम राख्ने ग्राहकलाई बोनस, छुट वा अतिरिक्त सुविधा दिने ‘लोयल्टी बोनस’ जस्ता कार्यक्रम प्रभावकारी हुन सक्छन्। पछिल्लो समय केही जीवन बीमा कम्पनीले यस्तो अवधारणा लागू गर्न थालेका छन्।

त्यस्तै, बीमालेख व्यतीत नगर्ने ग्राहकलाई थप सुविधा वा अन्य प्रोत्साहन दिने व्यवस्था पनि गर्न सकिन्छ।

प्रविधिको प्रयोग बढाउनुपर्ने

मोबाइल एप तथा अनलाइन पोर्टलमार्फत बीमाशुल्क भुक्तानी, बीमालेख नवीकरण तथा पुनर्जागरणलाई सहज बनाउन सकिन्छ। ग्राहकको व्यवहार विश्लेषण गरी बीमालेख बन्द गर्न सक्ने सम्भावना भएका ग्राहक पहिचान गरेर समयमै सूचना तथा परामर्श दिन पनि डेटा एनालिटिक्सको प्रयोग गर्न सकिन्छ।

बीमालेख बन्द गर्ने कारण पहिचान आवश्यक

बीमालेख समर्पण गर्ने ग्राहकसँग प्रत्यक्ष संवाद वा ‘एक्जिट इन्टरभ्यु’ गरी त्यसको कारण पत्ता लगाउन सकिन्छ। यस्तो प्रतिक्रियाका आधारमा बीमा कम्पनीले आफ्नो उत्पादन, सेवा तथा ग्राहक व्यवस्थापनमा सुधार गर्न सक्छन्।

अभिकर्ताको भूमिका महत्वपूर्ण

बीमा अभिकर्तालाई ग्राहकको आवश्यकता, सहानुभूति र नैतिक बिक्रीसम्बन्धी तालिम दिनुपर्ने देखिन्छ। अभिकर्ताको कार्यसम्पादन मूल्यांकन गर्दा नयाँ बीमालेख बिक्रीको संख्यासँगै बीमालेख निरन्तरताको अवस्थालाई समेत महत्वपूर्ण सूचक बनाउन सकिन्छ।

समग्रमा, बीमितको आवश्यकता र आर्थिक क्षमताअनुसार उपयुक्त बीमालेख बिक्री गर्ने, पारदर्शी जानकारी उपलब्ध गराउने, नियमित सम्पर्क कायम राख्ने तथा ग्राहक सेवामा सुधार गर्ने हो भने जीवन बीमालेख समयअगावै समर्पण हुने क्रम घटाउन सकिने देखिन्छ।

Originally published on abcnews.com.np.