काठमाडौं । ललितपुरको ग्वार्कोस्थित बीएन्डबी अस्पतालको आईभीएफ सेन्टरमा नाबालिगको डिम्ब निकालिएको घटनाबारे प्रसूति तथा स्त्रीरोग विशेषज्ञ डा. नूतन शर्मा प्रहरीसमक्ष हाजिर भएकी छन् ।

जिल्ला प्रहरी परिसर ललितपुर र सरकारी वकिल कार्यालयमा उपस्थित भएर बयान दिँदै डा. शर्माले सम्बन्धित किशोरी नाबालिग रहेको आफूलाई जानकारी नभएको बताएकी छन् ।

प्रहरी स्रोतका अनुसार डा. शर्माले उपचार तथा प्रक्रियागत विषयमा आफ्नो कुनै गलत नियत नरहेको बयान दिएकी छन् । अस्पतालमा आउने बिरामी वा डिम्बदाताको उमेर, परिचयपत्र तथा आवश्यक कानुनी कागजात प्रमाणीकरण गर्ने जिम्मेवारी प्रशासनिक कर्मचारीको हुने भएकाले आफू त्यस विषयमा जानकार नरहेको उनको भनाइ छ ।

पेसागत कामका सिलसिलामा आफू फिलिपिन्समा रहेकाले समयमै उपस्थित हुन नसकेको र स्वदेश फर्किएलगत्तै अनुसन्धानमा सहयोग गर्न प्रहरीसमक्ष हाजिर भएको उनले बताएकी छन् ।

डा. शर्माविरुद्ध अदालतबाट पक्राउ पुर्जी जारी नभएको र उनी स्वयं उपस्थित भई अनुसन्धानमा पूर्ण सहयोग गर्ने प्रतिबद्धता जनाएपछि सरकारी वकिल कार्यालयले उनलाई हाजिर जमानतमा छाडेको जनाइएको छ ।

Originally published on abcnews.com.np.