काठमाडौं । अस्ट्रेलियाको सिड्नी विमानस्थलमा दुई यात्रुवाहक विमान एकापसमा ठोक्किनबाट जोगिएका छन्। घटनामा एक जना चालक दलका सदस्य घाइते भएका छन्।

आइतबार सिड्नी विमानस्थलमा जेटस्टारको एयरबस ए३२० र कतार एयरवेजको बोइङ ७७७ नजिकिएपछि दुवै विमानलाई तत्काल रोकिएको थियो।

अस्ट्रेलियन ट्रान्सपोर्ट सेफ्टी ब्युरोका अनुसार जेटस्टारको ए३२० विमान क्विन्सल्यान्डको गोल्ड कोस्टका लागि उडान भर्न ट्याक्सी गरिरहेको थियो। त्यही क्रममा अर्को ट्याक्सीवेमा टोइङ गाडीमार्फत लैजाँदै गरिएको कतार एयरवेजको बोइङ ७७७ विमान निकै नजिक आएको चालक दलका सदस्यले देखेका थिए।

दुवै विमान तत्काल रोकिए पनि जेटस्टारको क्याबिनभित्र हिँडिरहेका एक चालक दलका सदस्य लडेर घाइते भएका थिए। उनको घटनास्थलमै प्यारामेडिक्स टोलीले उपचार गरेको थियो।

घटनामा कतार एयरवेजको बोइङ ७७७ को अगाडिको ह्वील अर्थात् नोज गियर र टोइङ गाडीबीचको कनेक्सनमा क्षति पुगेको बताइएको छ।

घटनाको कारण पत्ता लगाउन अस्ट्रेलियाली सुरक्षा निकायले अनुसन्धान थालेको छ। अधिकारीहरूले दुवै विमान र एयर ट्राफिक कन्ट्रोलबाट आवश्यक तथ्य तथा डाटा संकलन गरिरहेका छन्। चालक दलका सदस्य तथा टोइङ गाडीका अपरेटरसँग पनि सोधपुछ भइरहेको छ।

नियामक निकायले घटनाका बेला विमानस्थलमा रहेका प्रत्यक्षदर्शीलाई उपलब्ध भए घटना सम्बन्धी फोटो वा भिडियो उपलब्ध गराउन आग्रह गरेको छ।

जेटस्टारले पनि घटनाबारे छुट्टै अनुसन्धान गरिरहेको जनाएको छ। घटनाका कारण सिड्नी विमानस्थलमा केही उडान प्रभावित भएको एयरसर्भिसेस अस्ट्रेलियाले जनाएको छ।

Originally published on abcnews.com.np.