काठमाडौँ । डिजिटल भुक्तानी सेवा प्रदायक इसेवाले ललितपुरको पुल्चोकस्थित लबिम मलमा ‘श्रावण र शृङ्गार’ कार्यक्रम सम्पन्न गरेको छ।

श्रावण २३ र २४ गते आयोजित कार्यक्रममा इसेवा प्रयोगकर्तासहित विभिन्न क्षेत्र र पृष्ठभूमिका महिलाको सहभागिता रहेको थियो। कार्यक्रममा सहभागीहरूले श्रावण तथा तीजको सांस्कृतिक उत्साह साटासाट गर्दै मनोरञ्जन लिएका थिए।

कार्यक्रममा मेहेन्दी लगाउने, पोलारोइड फोटो बुथमा तस्बिर खिच्ने तथा विभिन्न खेलमा सहभागी भएर पुरस्कार जित्नेलगायत गतिविधि सञ्चालन गरिएको थियो। यी गतिविधिले सहभागीलाई मनोरञ्जनसँगै सांस्कृतिक अनुभव प्रदान गरेको कम्पनीले जनाएको छ।

‘श्रावण र शृङ्गार’ कार्यक्रम इसेवाले महिनाभर सञ्चालन गरिरहेको ‘#SheIsTheGreenFlag’ अभियानअन्तर्गत आयोजना गरिएको हो। अभियानले आत्मविश्वासका साथ अघि बढ्न, आफ्नो लक्ष्य पूरा गर्न तथा समाजमा सकारात्मक प्रभाव पार्ने महिलालाई सम्मान गर्ने उद्देश्य राखेको कम्पनीले जनाएको छ।

कम्पनीका अनुसार कार्यक्रममार्फत महिलाप्रतिको सम्मान र कदरलाई प्रवर्द्धन गर्दै सांस्कृतिक परम्परा र सामुदायिक सहभागितालाई एकै ठाउँमा जोड्ने प्रयास गरिएको हो।

Originally published on abcnews.com.np.