बागलुङ । रोटरी क्लब अफ बागलुङ र रोट्रयाक्ट क्लब अफ बागलुङको संयुक्त आयोजनामा बागलुङ नगरपालिका–३ रातमाटामा वृक्षारोपण गरिएको छ।

रोटरी डिस्ट्रीक्ट ३२९२ को गोलअन्तर्गत पञ्चायन गणेश मन्दिर व्यवस्थापन समितिको सहकार्यमा मन्दिर परिसरमा एक सयभन्दा बढी बिरुवा रोपिएको हो।

रोटरी क्लब अफ बागलुङ, रोट्रयाक्ट क्लब अफ बागलुङ, पञ्चायन गणेश मन्दिर व्यवस्थापन समिति तथा स्थानीयवासीको सहभागितामा बेल, जाकारान्डा, कल्की, अमला, गुलमोहर र धुपीलगायतका बिरुवा रोपिएको रोटरी क्लब अफ बागलुङका अध्यक्ष पुनमप्रसाद शर्माले जानकारी दिए।

वृक्षारोपण कार्यक्रममा क्लबका पदाधिकारी तथा सदस्य, मन्दिर व्यवस्थापन समितिका पदाधिकारी तथा सदस्य र स्थानीयवासीको सहभागिता रहेको थियो।

कार्यक्रमका क्रममा स्थानीयवासीलाई विभिन्न प्रजातिका १२ वटा फूलका बिरुवासमेत हस्तान्तरण गरिएको अध्यक्ष शर्माले बताए।

वातावरण संरक्षणसँगै मन्दिर परिसरको सौन्दर्यीकरण र हरियाली प्रवर्द्धन गर्ने उद्देश्यले वृक्षारोपण गरिएको आयोजकले जनाएको छ।

Originally published on abcnews.com.np.