काठमाडौँ । नाडा अटोमोबाइल्स एसोसिएसन अफ नेपालले नेपाली अटोमोबाइल क्षेत्रको ठूलो तथा प्रतिक्षित मेला ‘एचपी प्रेजेन्ट्स नाडा अटो शो २०२६’ आयोजना गर्ने भएको छ। नाडाको स्वर्ण जयन्तीको पूर्वसन्ध्यामा आयोजना हुने मेलाको १८औँ संस्करण भदौ ९ देखि १४ गतेसम्म काठमाडौँको भृकुटीमण्डप प्रदर्शनी परिसरमा सञ्चालन हुनेछ।

आयोजकका अनुसार अटो शो अटोमोबाइल, आयल तथा पार्टपुर्जा व्यवसायीका लागि व्यावसायिक प्रवर्द्धनको प्रभावकारी माध्यम बन्नेछ। मेलालाई लिएर देशभरका अटो व्यवसायीमा उत्साह देखिएको छ। स्टलका लागि अत्यधिक माग भए पनि प्रदर्शनीस्थलमा पर्याप्त ठाउँको अभावका कारण सबै इच्छुक व्यवसायीलाई स्टल उपलब्ध गराउन कठिनाइ भइरहेको नाडाले जनाएको छ।

यस वर्षको अटो शोमा साना तथा ठूला गरी २०० वटा स्टल रहनेछन्। प्रदर्शनीमा २२ ब्रान्डका पेसेन्जर कार, १६ ब्रान्डका लाइट कमर्सियल भेहिकल र १२ ब्रान्डका दुईपाङ्ग्रे सवारीसाधन सहभागी हुनेछन्।

त्यस्तै, ८ नेपाली उत्पादकसहित ६९ वटा कम्पोनेन्ट तथा अन्य सरोकारवाला व्यवसायीले आफ्ना उत्पादन तथा सेवा प्रदर्शनीमा राख्नेछन्। स्वदेशी उत्पादनसँगै अन्तर्राष्ट्रिय ब्रान्डको सहभागिता रहने अटो शोले सुस्ताएको नेपाली अटोमोबाइल बजारलाई पुनः चलायमान बनाउन महत्त्वपूर्ण योगदान गर्ने आयोजकको अपेक्षा छ।

नयाँ प्रविधि र उत्पादनको प्रदर्शन

नाडाका अनुसार मेलामार्फत नेपाली अटोमोबाइल क्षेत्रमा भित्रिएका नयाँ प्रविधि तथा उत्पादन प्रदर्शन गरिनेछ। उपभोक्ताले एउटै स्थानमा विभिन्न ब्रान्डका सवारीसाधन तथा उत्पादनको अवलोकन र तुलना गर्ने अवसर पाउनेछन्।

आयोजकले अटो शोले व्यवसाय विस्तारसँगै नेपालको समग्र आर्थिक गतिविधि र आर्थिक विकासमा समेत योगदान पुर्‍याउने विश्वास व्यक्त गरेको छ।

Originally published on abcnews.com.np.