काठमाडौं । राष्ट्रिय स्वतन्त्र पार्टी (रास्वपा)की सांसद समीक्षा बास्कोटाले मेची राजमार्गअन्तर्गत माइखोला क्षेत्रमा सडक अवरुद्ध भएको विषयमा सरकारको ध्यानाकर्षण गराउनुभएको छ। सोमबार प्रतिनिधिसभा बैठकमा बोल्दै उहाँले माइखोला क्षेत्रमा पटकपटक सडक अवरुद्ध हुने गरेको भन्दै दीर्घकालीन समाधान खोज्न सरकारसँग आग्रह गर्नुभयो।

सांसद बास्कोटाले यसअघि पनि सांसदहरूले यही विषय सदनमा उठाउँदै आएको स्मरण गराउँदै अब पुनः समस्या दोहोरिन नदिने गरी सरकारले आवश्यक कदम चाल्नुपर्ने बताउनुभयो। उहाँले भन्नुभयो, “मेची राजमार्गको माइखोलामा बाटो अवरुद्ध यसपटक मात्र भएको हो ? हरेकपटक भइरहेको छ, हरेकपटक यो विषय सदनमा उठ्दै आएको छ। अब फेरि उठाउन नपरोस्।”

माइखोला क्षेत्रमा वैकल्पिक मार्गसमेत पहिरोका कारण अवरुद्ध भएको उहाँले जानकारी गराउनुभयो। तमोर करिडोरमा पुल निर्माण नहुँदा समस्या पूर्ण रूपमा समाधान हुन नसकेको उल्लेख गर्दै बास्कोटाले सडक अवरोधका कारण किसानको उत्पादन बजारसम्म पुग्न नसकेको बताउनुभयो।

उहाँले सडक अवरोधका कारण किसानको उत्पादन बजारसम्म पुग्ने पहुँच मात्र नभई उत्पादन नै बिग्रिएर खेर जाने अवस्था रहेको बताउनुभयो। “किसानको उत्पादनको बजारसँगको पहुँच मात्र अवरुद्ध भएको छैन, उत्पादन नै बिग्रिएर खेर जाने गरेको छ,” उहाँले भन्नुभयो।

माइखोला क्षेत्रमा पटकपटक राजमार्ग अवरुद्ध हुँदा किसान तथा स्थानीयवासी प्रत्यक्ष प्रभावित भइरहेको भन्दै सांसद बास्कोटाले सम्बन्धित मन्त्रालयले दीर्घकालीन समाधान खोज्नुपर्नेमा जोड दिनुभयो।

Originally published on abcnews.com.np.