काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले रासायनिक मलको आयात प्रक्रिया यथाशीघ्र सम्पन्न गरी किसानका लागि पर्याप्त मल आपूर्ति सुनिश्चित गर्न सरकारसँग माग गरेका छन्।

सोमबार वक्तव्य जारी गर्दै प्रचण्डले मधेससहित देशका विभिन्न भागमा रासायनिक मलको सहज आपूर्ति हुन नसक्दा किसान समस्यामा परेको बताएका छन्। सरकारले समयमै पर्याप्त मल उपलब्ध गराउने प्रतिबद्धता जनाए पनि व्यवहारमा त्यसअनुसार आपूर्ति हुन नसकेको उनको भनाइ छ।

मल आयात प्रक्रिया जटिल भएकाले समयमै पूर्वतयारी गर्नुपर्नेमा जोड दिँदै प्रचण्डले आगामी आर्थिक वर्षका लागि समेत आवश्यक तयारी र बजेटको व्यवस्था गर्न सरकारको ध्यानाकर्षण गराएका छन्।

उनले मलको कालोबजारी तथा बिचौलियामाथि प्रभावकारी नियन्त्रण गर्न र किसानलाई सहज, पारदर्शी तथा समन्यायिक रूपमा मल वितरण गर्ने व्यवस्था मिलाउन माग गरेका छन्।

आफ्नो नेतृत्वको तत्कालीन सरकारले मल आयात तथा वितरणको गम्भीरता बुझेर समयमै आपूर्ति गर्नुका साथै अर्को आर्थिक वर्षका लागि समेत बजेट सुनिश्चित गरेको दाबी गर्दै प्रचण्डले किसानले समयमा मल नपाउने अवस्था अन्त्य गर्न सरकार गम्भीर हुनुपर्ने बताएका छन्।

Originally published on abcnews.com.np.