काठमाडौं — नेपाली चलचित्र ‘गौँथली’ले प्रदर्शनको छोटो समयमै २० करोड रुपैयाँ नजिकको ग्रस कमाइ गरेको छ।

चलचित्र विकास बोर्डले सोमबार सार्वजनिक गरेको विवरणअनुसार ‘गौँथली’ले हालसम्म १९ करोड ७१ लाख ६ हजार रुपैयाँ ग्रस कमाएको छ। फिल्मका ७ लाख १५ हजारभन्दा बढी टिकट बिक्री भइसकेका छन्।

यससँगै ‘गौँथली’ नेपाली चलचित्रको इतिहासमा सर्वाधिक कमाइ गर्ने फिल्मको सूचीमा चौथो स्थानमा उक्लिएको छ।

फिल्मले यसअघि सर्वाधिक कमाइ गर्ने सूचीमा रहेका ‘जारी’ (१७ करोड ४८ लाख), ‘छक्का पञ्जा ४’ (१७ करोड ५३ लाख) र ‘परान’ (१७ करोड ७६ लाख) को लाइफटाइम कमाइलाई पछाडि पारेको हो।

अब ‘गौँथली’भन्दा अगाडि ‘१२ गाउँ’ रहेको छ, जसले १९ करोड ९२ लाख रुपैयाँ ग्रस कमाएको छ। ‘गौँथली’लाई तेस्रो स्थानमा पुग्न अब करिब २१ लाख रुपैयाँ थप कमाइ आवश्यक छ।

सूचीको दोस्रो स्थानमा ‘कबड्डी ४’ रहेको छ। उक्त फिल्मले २१ करोड ४० लाख रुपैयाँ ग्रस कमाएको थियो।

नेपाली चलचित्रमध्ये सर्वाधिक कमाइको कीर्तिमान भने **‘पूर्णबहादुरको सारंगी’**को नाममा छ। फिल्मले ४६ करोड ८७ लाख रुपैयाँ ग्रस कमाएको बोर्डको विवरणमा उल्लेख छ।

डा. कपिल रिजालको निर्देशन

डा. कपिल रिजाल निर्देशित ‘गौँथली’मा अरुण क्षेत्री र सिम्रन खड्का मुख्य भूमिकामा छन्। फिल्मको कथा डा. भोला रिजालको रहेको छ।

फिल्मका निर्माता सुमन गिरी र कपिल रिजाल हुन्।

‘गौँथली’को निरन्तरको व्यावसायिक प्रदर्शनसँगै फिल्मले अब ‘१२ गाउँ’लाई पछि पार्दै नेपाली चलचित्रको सर्वाधिक कमाइ गर्ने सूचीमा तेस्रो स्थान हासिल गर्छ कि गर्दैन भन्नेमा दर्शक तथा फिल्म क्षेत्रको चासो बढेको छ।

Originally published on abcnews.com.np.