काठमाडौं । नेपाली कांग्रेसले पार्टीको आगामी १५औँ महाधिवेशनको आन्तरिक तयारी अघि बढाउने निर्णय गरेको छ।

सानेपास्थित पार्टी केन्द्रीय कार्यालयमा आइतबारदेखि जारी केन्द्रीय कार्यसमितिको बैठकले महाधिवेशनको तयारीलाई तीव्रता दिने निर्णय गरेको पार्टी प्रवक्ता देवराज चालिसेले जानकारी दिए।

उनका अनुसार महाधिवेशनका लागि आवश्यक आन्तरिक तयारी तथा सांगठनिक प्रक्रियालाई अघि बढाउने विषयमा बैठकले निर्णय गरेको हो।

केन्द्रीय कार्यसमितिको बैठकले मुलुकमा देखिएका जनजीविकासँग सम्बन्धित समसामयिक समस्याप्रति सरकारको ध्यानाकर्षण गराउने निर्णयसमेत गरेको छ।

कांग्रेसले बजारमा देखिएको खाना पकाउने ग्यासको अभाव, विद्युत् महसुलमा लगाइएको मूल्य अभिवृद्धि कर (भ्याट), किसानले भोगिरहेको रासायनिक मलको चरम अभाव तथा बढ्दो महँगीप्रति गम्भीर चिन्ता व्यक्त गरेको छ।

विशेषगरी ग्यासको आपूर्ति सहज हुन नसक्नुमा भण्डारण व्यवस्थापनको कमजोरी तथा सरकारको अदूरदर्शी नीतिले समस्या थप जटिल बनाएकोकांग्रेसको निष्कर्ष छ।

पार्टीले तत्काल ग्यासको आपूर्ति सहज बनाउन सरकारसँग माग गरेको प्रवक्ता चालिसेले बताए।

मंगलबार पनि बैठक बस्ने

कांग्रेस केन्द्रीय कार्यसमितिको बैठक मंगलबार पनि जारी रहनेछ। प्रवक्ता चालिसेका अनुसार मंगलबारको बैठकमा राजनीतिक तथा अन्य समसामयिक विषयमा छलफल हुनेछ।

महाधिवेशनको तयारीसँगै जनजीविकाका विषयलाई पनि बैठकले प्राथमिकतामा राखेपछि कांग्रेसले आगामी दिनमा सरकारका कामकारबाहीप्रति थप राजनीतिक दबाब सिर्जना गर्ने संकेत गरेको छ।

Originally published on abcnews.com.np.