काठमाडौं । मदनकृष्ण श्रेष्ठको जीवनमा आधारित बायोपिक चलचित्र ‘म मदनकृष्ण’मा अभिनेत्री वर्षा राउत अनुबन्ध भएकी छन् । चलचित्रमा उनले हरिवंश आचार्यकी श्रीमतीको भूमिका निर्वाह गर्नेछिन् ।

हरिवंश आचार्यको भूमिकामा अभिनेता अरुण क्षेत्री यसअघि नै अनुबन्ध भइसकेका छन् । यससँगै वर्षाले अरुणको अपोजिटमा अभिनय गर्नेछिन् । निर्माण पक्षका अनुसार यही जोडीले त्यसपछि निर्माण हुने हरिवंश आचार्यको बायोपिकमा पनि निरन्तरता पाउनेछ ।

‘म मदनकृष्ण’मा मदनकृष्ण श्रेष्ठको भूमिका अभिनेता महेश त्रिपाठीले निर्वाह गर्नेछन् भने उनकी श्रीमती यशोदाको भूमिकामा केकी अधिकारी देखिनेछिन् ।

मदनकृष्ण श्रेष्ठको बाल्यकाल, सरकारी जागिरे जीवन, हरिवंश आचार्यसँगको सहकार्य, अन्तरजातीय विवाहलगायत जीवनका महत्वपूर्ण घटना चलचित्रमा समेटिने निर्माण पक्षले जनाएको छ । चलचित्रले उनको जीवनका सुख–दुःख, संघर्ष तथा आरोह–अवरोहलाई प्रस्तुत गर्नेछ ।

मिलन चाम्सले निर्देशन गर्ने चलचित्रमा राजाराम पौडेल, किरण केसी, रुषा न्यौपाने, यमन श्रेष्ठ र देशभक्त खनाललगायत कलाकारको पनि अभिनय रहनेछ ।

भिन्टेज मोसन पिक्चर्सको प्रस्तुति रहेको ‘म मदनकृष्ण’लाई राजकुमार श्रेष्ठले निर्माण गर्नेछन् ।

Originally published on abcnews.com.np.