काठमाडौं । निर्देशक सौरभ चौधरीको निर्देशनमा निर्माण हुन लागेको चलचित्र ‘द राइज अफ साम्राज्य’ मा अभिनेता दयाहाङ राई अनुबन्धित भएका छन्। यसअघि मुख्य भूमिकाका लागि अभिनेता सौगात मल्ललाई अनुबन्ध गरिसकेको निर्माण पक्षले दयाहाङलाई पनि चलचित्रमा समावेश गरेको हो।

निर्देशक चौधरीका अनुसार चलचित्रमा सौगात र दयाहाङसँगै अन्य केही चर्चित कलाकारलाई पनि समावेश गर्ने तयारी भइरहेको छ।

“हामीले हालसम्म सौगात र दयाहाङलाई हाम्रो चलचित्रमा समावेश गरेका छौँ। यी दुई कलाकारसँगै अझै केही उत्कृष्ट नामहरू बाँकी छन्। दर्शकलाई स्तरीय सिनेमा दिनु हाम्रो उद्देश्य हो र यस पटक हामी कुनै कसर छोड्ने छैनौँ,” निर्देशक चौधरीले भने।

दयाहाङ र सौगातको सहभागिताले चलचित्रको स्टारकास्ट थप बलियो बनेको निर्माण पक्षको विश्वास छ। निर्देशक चौधरीले दयाहाङसँग पहिलोपटक सहकार्य गर्न लागेका हुन्।

डार्क हर्स इन्टरटेन्मेन्टको ब्यानरमा निर्माण हुने चलचित्रलाई मल्टीस्टार प्रोजेक्टका रूपमा अघि बढाइएको छ। चलचित्रको कथा तथा पटकथा उपन्यासकार बुद्धिसागरले लेखेका छन्। निर्देशक चौधरीले ‘द राइज अफ साम्राज्य’लाई ‘एपिक एक्सन ड्रामा’ शैलीको चलचित्रका रूपमा प्रस्तुत गर्ने तयारी गरिएको बताए।

निर्माण पक्षले यसपटक चलचित्रलाई अघिल्ला परियोजनाभन्दा ठूलो स्केलमा निर्माण गर्ने तयारी गरेको छ। चलचित्र नेपाली सिनेमाकै ठूलो एक्सन चलचित्र बन्ने दाबीसमेत निर्माण पक्षले गरेको छ।

चलचित्रको छायांकन आगामी भदौ १ गतेदेखि सुरु हुने भएको छ। निर्माण टोलीले करिब ७० दिनको छायांकन तालिका तयार पारेको छ। चलचित्रको अधिकांश छायांकन पूर्वी नेपालका विभिन्न स्थानमा गरिनेछ।

चलचित्रका निर्माता प्रवेश चौधरी र निला देव रहेका छन्। विश्वास बस्नेत (बेन) सहनिर्माता तथा शंकर पाण्डे कार्यकारी निर्माताका रूपमा रहेका छन्।

Originally published on abcnews.com.np.