काठमाडौं । हास्य कलाकार शिव शंकर रिजाल ‘जोगिन्दर’ले गाईजात्रा पर्वलाई लक्षित गर्दै ‘बालेन सरकार’ नामक व्यंग्यात्मक कमेडी सार्वजनिक गरेका छन्।

विसं २०८३ को गाईजात्राका अवसरमा ल्याइएको कमेडीमा समसामयिक विषयवस्तु, राजनीतिक घटनाक्रम तथा नेताहरूलाई व्यंग्य गरिएको छ। रिजालले ‘बालेन सरकार’मार्फत सरकारलाई खबरदारी गर्नुका साथै गत फागुन २१ गते सम्पन्न प्रतिनिधिसभा निर्वाचनप्रति समेत कटाक्ष गरेका छन्।

कमेडीमा नेपाली समाजमा देखिएका विभिन्न प्रवृत्ति, राजनीतिक गतिविधि र सामाजिक विकृतिलाई हास्यव्यंग्यको शैलीमा प्रस्तुत गरिएको छ।

मनोरञ्जनसँगै चेतना

२३ वर्षदेखि नियमित रूपमा हास्यव्यंग्य प्रस्तुत गर्दै आएका रिजालले गाईजात्राको अवसरमा दर्शक तथा स्रोतामाझ मनोरञ्जनसँगै सामाजिक चेतना प्रवाह गर्ने उद्देश्यले ‘बालेन सरकार’ ल्याएको बताए।

उनका अनुसार गाईजात्रे कमेडीले समाजका विभिन्न विकृति र विसंगतिलाई उजागर गर्दै सम्बन्धित पक्षलाई खबरदारी गर्ने प्रयास गरेको छ। हास्यव्यंग्यका माध्यमबाट प्रस्तुत गरिएका विषयले दर्शकलाई मनोरञ्जन दिनुका साथै सामाजिक चेतनासमेत प्रदान गर्ने उनको भनाइ छ।

Originally published on abcnews.com.np.