विराटनगर, साउन २७ गते । कोशी प्रदेशमा लागुऔषधको अवैध कारोबार तथा ओसारपसार बढ्दै गएको पाइएको छ। कोशी प्रदेश प्रहरी कार्यालयको तथ्याङ्कअनुसार पछिल्लो तीन वर्षमा खैरो हेरोइन (ब्राउन सुगर) को बरामद परिमाण तीन गुणाभन्दा बढीले बढेको छ।

प्रहरीका अनुसार तीन वर्षअघि ३ किलो ब्राउन सुगर बरामद भएकोमा आर्थिक वर्ष २०८१/८२ मा ५ किलो र गत आर्थिक वर्ष २०८२/८३ मा १० किलो बरामद भएको छ। बरामद परिमाण निरन्तर बढ्नुले ब्राउन सुगरको कारोबार तथा यसको सञ्जाल विस्तार हुँदै गएको प्रहरीको निष्कर्ष छ।

प्रयोगकर्ताको रोजाइमा परिवर्तन

प्रहरीको तथ्याङ्कले लागुऔषध प्रयोगकर्ताको रोजाइमा समेत परिवर्तन आएको देखाएको छ। विगतमा सुई तथा ट्याब्लेटजन्य लागुऔषधको प्रयोग बढी हुने गरेकामा पछिल्लो समय ब्राउन सुगरका प्रयोगकर्ता बढ्दै गएको प्रहरीको भनाइ छ।

तीन वर्षअघि १० हजारभन्दा बढी एम्पुल बरामद भएकोमा दुई वर्षअघि ५ हजार र गत वर्ष २ हजार ४९ एम्पुलमा सीमित भएको छ। ट्याब्लेटजन्य लागुऔषधको बरामद परिमाण पनि तीन वर्षअघि ८ लाख ४३ हजारबाट घटेर गत वर्ष ७ लाख ४४ हजारमा झरेको छ।

सञ्जाल ध्वस्त पार्ने प्रहरीको तयारी

कोशी प्रदेशका प्रहरी प्रमुख प्रहरी नायब महानिरीक्षक शेखर खनालले लागुऔषध नियन्त्रणलाई प्राथमिकतामा राखिएको बताउनुभएको छ। फुटकर प्रयोगकर्तालाई पक्राउ गर्नेभन्दा पनि यसको मुख्य आपूर्ति सञ्जाल नै ध्वस्त पार्ने गरी अभियान सञ्चालन भइरहेको उहाँको भनाइ छ।

झापा, मोरङ र सुनसरीमा लागुऔषधविरुद्ध विशेष अभियान सञ्चालन गरिएको तथा स्थानीय तहका वडास्तरसम्म समिति गठन गरी अभियानलाई प्रभावकारी बनाइने प्रहरीले जनाएको छ।

गत वर्ष प्रहरीले २७ हजार किलोभन्दा बढी गाँजा बरामद गरी नष्ट गरेको थियो। लागुऔषधसम्बन्धी मुद्दामा २ हजार ७ जना पक्राउ परेका थिए भने ६० जना अझै फरार रहेको प्रहरीको तथ्याङ्क छ।

खुला सीमा मुख्य चुनौती

भारतसँग जोडिएको ४२७.९ किलोमिटर खुला सीमा लागुऔषध ओसारपसार नियन्त्रणमा चुनौती बनेको डिआइजी खनालले बताउनुभएको छ। सीमा क्षेत्रबाट हुने तस्करी तथा अवैध ओसारपसार नियन्त्रणका लागि प्रविधिमैत्री निगरानी, सीसीटीभी तथा आधुनिक अनुसन्धान उपकरणको प्रयोग बढाइने प्रहरीले जनाएको छ।

Originally published on abcnews.com.np.