काठमाडौं । देशका केही जिल्लामा आज (साउन २७ गते) आकस्मिक बाढीको जोखिम रहेको बाढी पूर्वानुमान महाशाखाले जनाएको छ। स–साना नदी तथा खोलामा पानीको बहाव उल्लेख्य बढ्न सक्ने भएकाले जोखिमयुक्त क्षेत्रमा सतर्कता अपनाउन आग्रह गरिएको हो।

महाशाखाका अनुसार सोलुखुम्बु, दोलखा, रामेछाप र सिन्धुपाल्चोक तथा आसपासका जिल्लाबाट बहने स–साना नदीमा बहाव बढ्ने सम्भावना छ। ती क्षेत्रमा आकस्मिक बाढीको मध्यम जोखिम रहेको पूर्वानुमान गरिएको छ।

नदी किनारका बासिन्दालाई सतर्क रहन आग्रह

महाशाखाले ती जिल्लाका नदी तथा खोला किनारमा बसोबास गर्ने स्थानीयवासीलाई विशेष सावधानी अपनाउन आग्रह गरेको छ। वर्षाका कारण एक्कासि पानीको सतह बढ्न सक्ने भएकाले नदी तथा खोलामा नजान र जोखिमयुक्त क्षेत्रमा आवश्यक सतर्कता अपनाउन भनिएको छ।

यसअघि पनि वर्षायाममा सोलुखुम्बु, दोलखा, रामेछाप र सिन्धुपाल्चोकलगायतका पहाडी जिल्लाका स–साना नदीमा आकस्मिक बाढीको जोखिमबारे महाशाखाले नियमित चेतावनी दिँदै आएको छ।

Originally published on abcnews.com.np.