काठमाडौँ । जलस्रोत तथा सिँचाइ विभागले राष्ट्रिय गौरवका आयोजना तथा विभागअन्तर्गत सञ्चालित अन्य आयोजनाको भौतिक र आर्थिक प्रगतिको प्रभावकारी अनुगमन गर्न विशेष संयन्त्र निर्माण गरेको छ।

लामो समयदेखि सञ्चालनमा रहेका राष्ट्रिय गौरवका आयोजनाले लक्षित प्रगति हासिल गर्न नसकेको, निर्धारित समयसीमा नाघेको तथा निर्माणका क्रममा देखिएका समस्या समयमै समाधान हुन नसकेको अवस्थालाई सम्बोधन गर्न विभागले यस्तो संयन्त्र बनाएको हो।

विभागका अनुसार नयाँ संयन्त्रमार्फत आयोजनाको स्थलगत प्रगति, भौतिक तथा आर्थिक अवस्था, निर्माण तालिका, प्रमुख समस्या र समाधानका लागि चालिएका कदमबारे ऊर्जा, जलस्रोत तथा सिँचाइ मन्त्रालय र विभागबाट नियमित अनुगमन तथा समन्वय गरिनेछ।

समस्याको पहिचान गरी जिम्मेवार निकाय तोक्ने, समाधानका लागि समयसीमा निर्धारण गर्ने र त्यसको नियमित फलोअप गर्ने प्रणालीसमेत विकास गरिने विभागले जनाएको छ।

मन्त्री श्रेष्ठद्वारा आयोजना प्रमुखसँग बैठक आह्वान

यसै क्रममा ऊर्जा, जलस्रोत तथा सिँचाइ मन्त्री विराजभक्त श्रेष्ठले राष्ट्रिय गौरवका आयोजनाको प्रगति समीक्षा तथा आगामी कार्ययोजना तयार गर्न आगामी साता सबै आयोजना प्रमुखसँग बैठक आह्वान गरेका छन्।

बैठकमा आयोजनाको वर्तमान अवस्था, निर्माणमा देखिएका समस्या, समाधानका उपाय तथा आगामी कार्ययोजनाबारे छलफल गरिने बताइएको छ।

प्रारम्भिक चरणमा विभागअन्तर्गतका ६ वटा राष्ट्रिय गौरवका आयोजनालाई प्राथमिकतामा राखेर अनुगमन गर्ने तयारी गरिएको छ।

प्राथमिकतामा रहेका आयोजनामा:

• महाकाली (तेस्रो) सिँचाइ आयोजना
• रानी जमरा कुलरिया सिँचाइ आयोजना
• बबई सिँचाइ आयोजना
• भेरी–बबई डाइभर्सन बहुउद्देश्यीय आयोजना
• सिक्टा सिँचाइ आयोजना
• सुनकोशी–मरिन डाइभर्सन बहुउद्देश्यीय आयोजना

रहेका छन्।

विभागले यी आयोजनाको प्रगति विवरण संकलन गर्ने संयन्त्रका रूपमा मात्र नभई समस्या पहिचान, तत्काल आवश्यक कार्य, जिम्मेवारी निर्धारण र परिणामको फलोअप गर्ने नतिजामुखी प्रणालीका रूपमा अनुगमन संयन्त्र सञ्चालन गर्ने जनाएको छ।

लामो समयदेखि निर्माणाधीन राष्ट्रिय गौरवका आयोजनालाई निर्धारित समय, लागत र गुणस्तरभित्र सम्पन्न गर्न थप जवाफदेहिता सिर्जना गर्ने उद्देश्यले संयन्त्रलाई प्रभावकारी बनाइने विभागको भनाइ छ।

आयोजनाअन्तर्गतका मुख्य संरचनाको निर्माणस्थल तथा आयोजना कार्यालयबाट प्राप्त विवरणलाई विभागको अनुगमन प्रणालीमा समेटिनेछ।

प्राप्त विवरणका आधारमा आयोजनाको प्रगति नियमित रूपमा समीक्षा गर्ने तथा समस्या देखिए तत्काल समाधानका लागि सम्बन्धित निकायसँग समन्वय गर्ने तयारी विभागले गरेको छ।

Originally published on abcnews.com.np.