काठमाडौं । उद्योग तथा वाणिज्य र श्रम तथा उपभोक्ता हित समितिले कालोबजारी गर्ने पेट्रोलपम्प तथा ग्यास डिलरको इजाजत खारेज गर्न सरकारलाई निर्देशन दिएको छ।

बुधबार बसेको समितिको बैठकले कालोबजारी नियन्त्रण तथा उपभोक्ताको हित संरक्षणका लागि यस्तो निर्देशन दिएको हो। समितिले अत्यावश्यक दैनिक उपभोग्य वस्तुको सहज आपूर्ति व्यवस्था मिलाउनसमेत सरकारलाई आग्रह गरेको छ।

समिति सभापति रहबर अन्सारीले कालोबजारीमा संलग्न व्यक्तिलाई कानुनी दायरामा ल्याई कारबाही गर्न निर्देशन दिए।

सभापति अन्सारीले पेट्रोलियम पदार्थसम्बन्धी ऐन तथा कालोबजारी नियन्त्रणसम्बन्धी विधेयक तयार गर्न आवश्यक प्रक्रिया अघि बढाउन उद्योग, वाणिज्य तथा आपूर्ति मन्त्रालय र मातहतका निकायलाई निर्देशन दिएका छन्।

उनले पेट्रोलियम पदार्थको आपूर्ति सहज बनाउन तथा कालोबजारी नियन्त्रणका लागि प्रभावकारी कानुनी व्यवस्था आवश्यक रहेको बताए।

समितिले दैनिक उपभोग्य अत्यावश्यक खाद्यवस्तुको आपूर्ति व्यवस्थापनमा विशेष ध्यान दिन सरकारलाई आग्रह गरेको छ।

उपभोक्ताले सहज रूपमा आवश्यक वस्तु प्राप्त गर्न सक्ने वातावरण बनाउन बजार अनुगमन तथा आपूर्ति व्यवस्थापनलाई प्रभावकारी बनाउनुपर्ने समितिको जोड छ।

पाम तेलमा मिसावटको अनुगमन गर्न निर्देशन

समितिले होटल तथा रेस्टुरेन्टमा प्रयोग हुने पाम तेलमा रासायनिक पदार्थ मिसावट गर्ने प्रवृत्ति देखिएको भन्दै त्यसको प्रभावकारी अनुगमन गर्नसमेत निर्देशन दिएको छ।

सभापति अन्सारीले मिसावट पुष्टि भए संलग्न व्यवसायी तथा व्यक्तिमाथि कानुनबमोजिम कारबाही गर्न निर्देशन दिए।

समितिले कालोबजारी, कृत्रिम अभाव र मिसावट नियन्त्रणका लागि बजार अनुगमनलाई प्रभावकारी बनाउँदै उपभोक्ताको अधिकार सुनिश्चित गर्न सरकारलाई आग्रह गरेको छ।

Originally published on abcnews.com.np.