रुपन्देही । बुटवलमा अन्तर्राष्ट्रिय आमन्त्रित पुरुष भलिबल प्रतियोगिता आयोजना हुने भएको छ । मदन भण्डारी स्पोर्ट्स एकेडेमीको बुटवलमा साउन २५ र २६ गते बसेको ११औँ पूर्ण बैठकले मदन भण्डारी कप अन्तर्राष्ट्रिय आमन्त्रित रनिङशिल्ड पुरुष भलिबल प्रतियोगिता–२०८३ आयोजना गर्ने निर्णय गरेको हो ।

प्रतियोगिता आगामी असोज १२ देखि १७ गतेसम्म बुटवल मण्डपमा सञ्चालन हुनेछ । प्रतियोगितामा नेपालका तीन टोलीसहित भारत, चीन, पाकिस्तान, श्रीलंका र बंगलादेशका टोली सहभागी गराउने तयारी गरिएको एकेडेमीका अध्यक्ष ध्रुव आचार्यले जानकारी दिनुभयो ।

आचार्यका अनुसार नेपालमा पहिलोपटक यस स्तरको अन्तर्राष्ट्रिय आमन्त्रित पुरुष भलिबल प्रतियोगिता आयोजना गर्न लागिएको हो । यसअघि एकेडेमीले इन्डो–नेपाल भलिबल प्रतियोगिता आयोजना गरेको थियो । सोही प्रतियोगितालाई थप परिमार्जन गर्दै दोस्रो संस्करणलाई अन्तर्राष्ट्रिय स्तरमा विस्तार गर्न लागिएको उहाँले बताउनुभयो ।

प्रतियोगिताको विजेताले नगद ७ लाख रुपैयाँसहित कप, मेडल र प्रमाणपत्र प्राप्त गर्नेछ । उपविजेतालाई ३ लाख ५० हजार, तेस्रो हुने टोलीलाई १ लाख ७५ हजार र सान्त्वना हुने टोलीलाई ७५ हजार रुपैयाँ प्रदान गरिनेछ ।

त्यस्तै, प्लेयर अफ द म्याचलाई १ लाख रुपैयाँ तथा सर्वोत्कृष्ट खेलाडीलाई १५ हजार रुपैयाँ प्रदान गरिनेछ । उत्कृष्ट स्पाइकर, सेटर, सर्भर, प्रशिक्षक, ब्लकर र डिफेन्सतर्फका खेलाडीलाई जनही ८ हजार रुपैयाँसहित कप र मेडल प्रदान गरिने आयोजकले जनाएको छ ।

प्रतियोगितामा करिब १२८ खेलाडी र १५० जना अफिसियल सहभागी हुने अनुमान गरिएको छ । प्रतियोगिता सञ्चालनका लागि आयोजकले करिब १ करोड १८ लाख रुपैयाँ खर्च हुने अनुमान गरेको छ ।

एकेडेमीको केन्द्रीय संरचनामा फेरबदल

बैठकले एकेडेमीको प्रदेश संरचनालाई प्रभावकारी र सक्रिय बनाउने निर्णयसमेत गरेको छ । सोहीअनुसार केन्द्रीय कमिटीमा फेरबदल गरिएको छ ।

नयाँ जिम्मेवारीअनुसार वरिष्ठ उपाध्यक्षमा मोहन रेग्मी, उपाध्यक्षमा झकबहादुर मिदुन, महासचिवमा मदन उप्रेती, उपमहासचिवमा चन्द्र बदना राई र रामबहादुर केसी तथा सचिवमा उदय अर्याल, निलम बज्राचार्य, विनोद आचार्य र नन्दु काउचालाई जिम्मेवारी दिइएको छ । कोषाध्यक्षमा कमल ढकाल चयन हुनुभएको छ ।

सदस्यहरूमा सिरिशा कार्की, अमरावती राना, राजीव राना, शिवराज राना, ऋषिराम गौतम, अनन्त श्रेष्ठ र राजेश महतोलाई जिम्मेवारी दिइएको छ ।

त्यस्तै, कोशी प्रदेश संयोजकमा उदयकुमार अर्याल, मधेश प्रदेश अध्यक्षमा रविन्द्रराज भण्डारी, बागमती प्रदेशमा रामबहादुर केसी, लुम्बिनी प्रदेश संयोजकमा बुद्धि बस्याल, गण्डकी प्रदेश अध्यक्षमा गिरमान गुरुङ, कर्णाली प्रदेश अध्यक्षमा गोपालबहादुर शाही र सुदूरपश्चिम प्रदेश संयोजकमा ज्ञानुराज दगौरालाई जिम्मेवारी दिइएको छ ।

Originally published on abcnews.com.np.