काठमाडौं । जनआस्था साप्ताहिकका प्रधान सम्पादक किशोर श्रेष्ठ पक्राउ परेलगत्तै प्रहरीले उहाँको निवास र कार्यालयमा खानतलासी गरेको छ ।

प्रहरीले बुधबार राति श्रेष्ठको निवासमा खानतलासी गरेको थियो भने बिहीबार बिहान कार्यालयमा पनि खानतलासी गरेको हो । श्रेष्ठलाई प्रहरीले बुधबार साँझ निवास नजिकबाट पक्राउ गरेको थियो ।

खानतलासीका क्रममा प्रहरीले श्रेष्ठको कार्यालयबाट मोबाइल र कम्प्युटर नियन्त्रणमा लिएको छ । अनुसन्धानका लागि ती उपकरण नियन्त्रणमा लिइएको काठमाडौं प्रहरी परिसरका प्रवक्ता एसपी दानबहादुर थापाले जानकारी दिए ।

अनुसन्धानका लागि उपकरण नियन्त्रणमा

प्रवक्ता थापाका अनुसार श्रेष्ठविरुद्धको अनुसन्धानलाई अघि बढाउने क्रममा निवास तथा कार्यालयमा खानतलासी गरिएको हो । नियन्त्रणमा लिइएका मोबाइल र कम्प्युटरको परीक्षण गरी अनुसन्धानका लागि आवश्यक प्रमाण संकलन गरिने प्रहरीले जनाएको छ ।

Originally published on abcnews.com.np.