काठमाडौं । चीनको न्यालम क्षेत्रमा पहिरो खस्दा नेपालतर्फ बग्ने भोटेकोसी नदीको बहाव प्रभावित भएको छ । सिन्धुपाल्चोकको भोटेकोसी गाउँपालिका–२ लिपिङको पारिपट्टि चीनतर्फ पर्ने न्यालम क्षेत्रमा बिहीबार भीरबाट ढुंगामाटोसहितको पहिरो खसेको हो ।

स्थानीय प्रहरीबाट प्राप्त जानकारीअनुसार पहिरोले चीनबाट नेपालतर्फ बग्ने भोटेकोसी नदीको बहाव करिब आधाजति रोकिएको अवस्थामा रहेको बाढी पूर्वानुमान महाशाखाले जनाएको छ ।

पहिरोका कारण नदीको बहाव अवरुद्ध भएकाले पानी जम्मा भएर पछि एक्कासि बहाव बढ्न सक्ने जोखिम रहेको भन्दै महाशाखाले नदी तटीय क्षेत्रका बासिन्दालाई सतर्क रहन आग्रह गरेको छ ।

महाशाखाले भोटेकोसी तथा सुनकोसी नदीको दोलालघाटसम्मको नदी तटीय क्षेत्रमा अर्को सूचना जारी नभएसम्म उच्च सतर्कता अपनाउन अनुरोध गरेको छ ।

पहिरोका कारण नदीको बहाव अवरुद्ध हुँदा अवरुद्ध क्षेत्रमा पानीको सतह बढ्न सक्ने र पहिरोले बनाएको अवरोध फुटेमा तल्लो तटीय क्षेत्रमा एक्कासि ठूलो बहाव आउन सक्ने जोखिम रहेको छ ।

त्यसैले दोलालघाटसम्मका नदी तटीय क्षेत्रका बासिन्दालाई नदीको अवस्था निगरानी गर्न तथा सम्भावित जोखिमबाट जोगिन आवश्यक सावधानी अपनाउन बाढी पूर्वानुमान महाशाखाले आग्रह गरेको छ ।

Originally published on abcnews.com.np.