काठमाडौं । हलिउड चलचित्र ‘स्पाइडरम्यान : ब्रान्ड न्यू डे’ ले नेपालमा प्रदर्शनको पहिलो चरणमै १४ करोड रुपैयाँभन्दा बढी ग्रसकलेक्सन गरेको छ।

चलचित्र विकास बोर्डको बक्सअफिस स्रोतका अनुसार बिहीबार बिहान ११ बजेसम्म चलचित्रले १४ करोड ७५ लाख रुपैयाँ ग्रसकलेक्सन गरेको हो।

यद्यपि यो कमाइ नेपाली चलचित्र ‘गौँथली’ भन्दा कम हो। सोही समयसम्म ‘गौँथली’ले २१ करोड ३६ लाख रुपैयाँ ग्रसकलेक्सन गरेको बक्सअफिस स्रोतले जनाएको छ।

‘गौँथली’ साउन १ गतेदेखि प्रदर्शनमा आएको हो भने ‘स्पाइडरम्यान : ब्रान्ड न्यू डे’ त्यसको दुई सातापछि अर्थात् साउन १४ गतेदेखि नेपालमा प्रदर्शनमा आएको हो।

हलमा फरक दर्शकको आकर्षण

हाल देशभरका हलमा ‘गौँथली’को शो संख्या बढी रहेको छ। यद्यपि देशकै ठूलो मल्टिप्लेक्स चेन क्यूएफएक्समा भने ‘स्पाइडरम्यान : ब्रान्ड न्यू डे’का शो बढी छन्।

दुवै चलचित्रमा दर्शकको रुचिमा समेत फरक देखिएको छ। ‘स्पाइडरम्यान : ब्रान्ड न्यू डे’ हेर्न हलमा युवा पुस्ताको उपस्थिति उल्लेख्य रहेको छ भने ‘गौँथली’मा महिला दर्शकको संख्या बढी देखिएको जनाइएको छ।

Originally published on abcnews.com.np.