काठमाडौं । बागमती प्रदेशसभा संसदीय दलका नेता जगन्नाथ थपलियाविरुद्ध अविश्वासको प्रस्ताव दर्ता भई नेतृत्व परिवर्तनको प्रक्रिया अघि बढिरहेका बेला उनले स्वास्थ्य लाभपछि पार्टीको जिम्मेवारीमा अझ सक्रिय भएर फर्किने बताएका छन्।

स्वास्थ्यमा सुधार भइरहेको जानकारी दिँदै बिहीबार विज्ञप्ति जारी गरेका थपलियाले एमाले बागमती प्रदेशलाई थप सुदृढ, एकताबद्ध र प्रभावकारी बनाउने प्रतिबद्धता व्यक्त गरेका छन्।

उनले विज्ञप्तिमा भनेका छन्, ‘स्वास्थ्य लाभपछि अझ बढी ऊर्जा र प्रतिबद्धताका साथ नेपाल कम्युनिस्ट पार्टी (एमाले) लाई बागमती प्रदेशमा थप सुदृढ, एकताबद्ध र प्रभावकारी बनाउँदै राष्ट्रियस्तरमा पार्टीको भूमिका अझ बलियो बनाउन आफ्नो जिम्मेवारीमा निरन्तर समर्पित रहनेछु।’

थपलियाले आफ्नो स्वास्थ्य अवस्थाबारे सञ्चारमाध्यममा आएका गलत सूचनाका आधारमा कुनै निष्कर्षमा नपुग्नसमेत आग्रह गरेका छन्। केही समय राजनीतिक गतिविधिबाट टाढा रहे पनि पार्टीभित्रको नेतृत्व विवादबाट आफू पछि नहट्ने र स्वास्थ्य लाभपछि पुनः सक्रिय हुने उनको भनाइ छ।

आठ दिनदेखि उपचाररत

साउन १८ गते प्रदेशको समसामयिक राजनीतिक विषयमा छलफलमा सहभागी भएका बेला रक्तचाप र मधुमेहमा असन्तुलन देखिएपछि थपलियाको स्वास्थ्यमा समस्या आएको थियो।

चिकित्सकको सल्लाहअनुसार उनी वीर अस्पतालमा भर्ना भएर करिब आठ दिनदेखि उपचाररत छन्। अहिले स्वास्थ्यमा सुधार भइरहेको उनले बताएका छन्।

१६ सांसदको अविश्वास प्रस्ताव

यसैबीच, बुधबार १६ जना सांसदको हस्ताक्षरसहित थपलियाविरुद्ध अविश्वासको प्रस्ताव दर्ता भएको थियो। अर्कोतर्फ, ९ जना सांसद थपलियाको पक्षमा रहेको बताइएको छ।

सांसदहरूको समर्थन विभाजित भएपछि एमाले बागमती प्रदेशसभा संसदीय दलको नेतृत्व परिवर्तनको सम्भावना बढेको छ। यस्तो अवस्थामा थपलियाले स्वास्थ्य लाभपछि पुनः सक्रिय भएर पार्टीभित्रको चुनौती सामना गर्ने संकेत दिएका छन्।

Originally published on abcnews.com.np.