बागलुङ । लगातारको वर्षाका कारण पश्चिम बागलुङको निसीखोला गाउँपालिका–२ मा पहिरो खस्दा करिब ४० घर उच्च जोखिममा परेका छन्। बिहीबार रातिदेखि परेको अविरल वर्षापछि शुक्रबार बिहान पहिरो खसेको हो।

निसीखोला गाउँपालिका–२ का वडाध्यक्ष कुविर विश्वकर्माका अनुसार उपल्लो बेङ्ग्री–हाँडिचार–बास्खोला सडकबाट खसेको पहिरोले धाराटोलसहित तल्लो क्षेत्रका बस्ती जोखिममा परेका छन्। पहिरो खस्ने क्रम अझै नरोकिएकाले थप क्षति हुन सक्ने जोखिम रहेको उनले बताए।

पहिरोका कारण धाराटोलका धनबहादुर खत्री, राजन परियार, दीपक परियार, ज्ञानबहादुर परियार, हरिकला घर्ती, तारा घर्ती, देविराम घर्ती र टिका घर्तीका घर, शौचालय तथा गोठमा क्षति पुगेको छ।

वडाध्यक्ष विश्वकर्माका अनुसार हालसम्म मानवीय क्षति भएको छैन। पहिरो खस्न थालेपछि स्थानीय बासिन्दा सुरक्षित स्थानतर्फ सरेका छन्।

स्थानीयका अनुसार नयाँ सडक निर्माण गरिएपछि त्यस क्षेत्रको जमिन कमजोर बनेकाले पहिरो खस्ने क्रम बढेको हो। निरन्तर वर्षा भइरहेकाले पहिरो थप फैलिन सक्ने र बस्तीमा थप क्षति पुग्न सक्ने भन्दै स्थानीय त्रसित छन्।

पहिरोले आठ घरपरिवारको भौतिक संरचनामा प्रत्यक्ष क्षति पुर्‍याएको छ। घर, शौचालय र गोठमा क्षति पुगेको वडाध्यक्ष विश्वकर्माले जानकारी दिए।

लगातारको वर्षाका कारण पहिरोको जोखिम अझै कायमै रहेकाले जोखिममा रहेका परिवारलाई सुरक्षित स्थानमा राख्ने तथा क्षतिको थप विवरण संकलन गर्ने काम भइरहेको छ। स्थानीय प्रशासन तथा सम्बन्धित निकायले सम्भावित जोखिमलाई ध्यानमा राख्दै उद्धार तथा राहतको तयारी गर्नुपर्ने अवस्था देखिएको छ।

Originally published on abcnews.com.np.