काठमाडौं । हङकङबाट लन्डन जाँदै गरेको क्याथे प्यासिफिकको यात्रुवाहक विमान गलत रेडियो फ्रिक्वेन्सी प्रयोग भएपछि नेटोको ‘अलर्ट’मा परेको घटना सार्वजनिक भएको छ।

क्याथे प्यासिफिकको सीएक्स२५७ उडान जुलाई ४ मा तीन सयभन्दा बढी यात्रु लिएर हङकङबाट लन्डनको हिथ्रोका लागि उडेको थियो। रोमानियाली हवाई क्षेत्रमा प्रवेश गरेपछि विमानले स्थानीय हवाई ट्राफिक नियन्त्रणसँग सञ्चार सम्पर्क गुमाएको थियो।

क्याथे प्यासिफिकको आन्तरिक अनुसन्धानअनुसार चालक दलले हवाई ट्राफिक नियन्त्रकले अर्को उडानका लागि दिएको निर्देशन गलत रूपमा बुझेका कारण गलत रेडियो फ्रिक्वेन्सी प्रयोग भएको थियो। सञ्चार सम्पर्क टुटेको कुरा चालक दलले तत्काल पहिचानसमेत गर्न सकेनन्।

हंगेरीका लडाकु विमान परिचालन

विमानसँग सम्पर्क स्थापित हुन नसकेपछि नेटोको सुरक्षा प्रोटोकलअनुसार हंगेरीका दुई लडाकु विमान क्याथे प्यासिफिकको विमानलाई अवरोध गर्न परिचालन गरिएका थिए।

हंगेरीका रक्षामन्त्री रोमुलुस्ज रुजिन–सेन्डीका अनुसार हंगेरीको सीमाना नजिकै लडाकु विमानहरूले यात्रुवाहक विमानलाई दृश्य संकेतमार्फत चेतावनी दिएका थिए। त्यसपछि क्याथे प्यासिफिकको विमानसँग पुनः सञ्चार सम्पर्क स्थापित भएको थियो।

प्राविधिक समस्या नभएको निष्कर्ष

हङकङको नागरिक उड्डयन विभागले क्याथे प्यासिफिकको विस्तृत अनुसन्धान प्रतिवेदनको समीक्षा पूरा गर्दै विमानको सञ्चार प्रणालीमा कुनै प्राविधिक समस्या नरहेको जनाएको छ। विमानका सञ्चार उपकरण सामान्य रूपमा सञ्चालनमा रहेको विभागको निष्कर्ष छ।

तर, विभागले घटनाप्रति ‘गम्भीर चिन्ता’ व्यक्त गर्दै सञ्चार प्रणालीको सञ्चालन तथा निगरानी प्रक्रियामा सुधार गर्न क्याथे प्यासिफिकलाई निर्देशन दिएको छ।

चालक दललाई थप तालिम

अनुसन्धानपछि एयरलाइन्सलाई चालक दललाई सञ्चारसम्बन्धी विषयमा थप सतर्क गराउन, संलग्न चालक दलका सदस्यलाई थप तालिम दिन तथा उनीहरूको मूल्याङ्कन गर्न निर्देशन दिइएको छ।

उड्डयन सुरक्षाका लागि चालक दल र हवाई ट्राफिक नियन्त्रकबीच निरन्तर तथा प्रभावकारी सञ्चार आवश्यक रहेको विभागले जनाएको छ। साथै, उड्डयन सुरक्षासम्बन्धी घटनाको रिपोर्टिङ प्रणाली थप सुदृढ गर्न पनि निर्देशन दिइएको छ।

क्याथे प्यासिफिकका प्रवक्ताका अनुसार एयरलाइन्सले अनुसन्धानबाट प्राप्त सुझावअनुसारका सुधारका उपायहरू जुलाईको मध्यतिरै कार्यान्वयनमा ल्याइसकेको छ।

Originally published on abcnews.com.np.