काठमाडौँ । नेपाली कांग्रेसका नेता विमलेन्द्र निधिले गगन थापा नेतृत्वको कार्यसमितिलाई पार्टीको आगामी १५औँ महाधिवेशन गर्ने अधिकार नरहेको दाबी गरेका छन्।

शुक्रबार काठमाडौँको सुकेधारामा आयोजित एक भेलालाई सम्बोधन गर्दै निधिले १४औँ महाधिवेशनबाट निर्वाचित शेरबहादुर देउवा नेतृत्वको कार्यसमितिले मात्रै १५औँ महाधिवेशन गर्न पाउने बताए।

“आगामी महाधिवेशन कसले गर्ने? जो १४औँ महाधिवेशनबाट सभापति बनेको छ, त्यसलाई मात्र १५औँ महाधिवेशन गर्ने अधिकार छ। अरूलाई महाधिवेशन गर्ने अधिकार छैन,” निधिले भने।

विशेष महाधिवेशनबाट बनेको कार्यसमितिमाथि प्रश्न

निधिले विशेष महाधिवेशनबाट बनेको गगन थापा नेतृत्वको कार्यसमितिलाई आगामी महाधिवेशन आयोजना गर्ने अधिकार नभएको दाबी गरे।

विशेष महाधिवेशनबाट निर्वाचित पदाधिकारीलाई १५औँ महाधिवेशन गर्ने अधिकार नहुँदा पार्टीमा धोकाधडी भएको उनको आरोप छ।

“विशेष महाधिवेशन पदाधिकारीलाई १५औँ महाधिवेशन गर्ने अधिकार छैन,” उनले भने।

देउवा नै सभापति रहेको दाबी

निधिले आफूहरूको दृष्टिमा नेपाली कांग्रेसको सभापति अझै पनि शेरबहादुर देउवा नै रहेको बताए।

उनले आगामी १५औँ महाधिवेशन पनि देउवाकै नेतृत्वमा सम्पन्न गर्नुपर्नेमा जोड दिए।

“नेपाली कांग्रेसको सभापति आज पनि शेरबहादुर देउवा नै हुनुहुन्छ। शेरबहादुर देउवाकै नेतृत्वमा १५औँ महाधिवेशन सम्पन्न गर्नुपर्छ,” निधिले भने।

Originally published on abcnews.com.np.