हेटौँडा । मकवानपुरको हेटौँडा उपमहानगरपालिका–१० स्थित बसपार्कमा गाडी पार्किङ गर्ने विषयमा भएको विवादले उग्र रूप लिँदा चार जना घाइते भएका छन्। विवादका क्रममा धारिलो हतियार प्रयोग भएको प्रहरीले जनाएको छ।

जिल्ला प्रहरी कार्यालय मकवानपुरका प्रहरी प्रवक्ता प्रहरी नायब उपरीक्षक माधवप्रसाद काफ्लेका अनुसार शुक्रबार मनहरी गाउँपालिका–१ मकरीका ३१ वर्षीय लक्ष्मण बर्तौलासहितको समूह र अर्को पक्षबीच बसपार्कमा गाडी पार्किङको विषयमा विवाद भएको थियो। विवाद बढ्दै गएपछि धारिलो हतियार प्रहार हुँदा चार जना घाइते भएका हुन्।

घटनामा मनहरी गाउँपालिका–६ का २७ वर्षीय जीवन गोले, ओखलढुंगाको सिंहदेवी गाउँपालिका–७ का २८ वर्षीय राइज आले मगर, चितवनको राप्ती नगरपालिका–२ मिलनटोलका ३२ वर्षीय रामबहादुर पाख्रिन र राप्ती नगरपालिका–४ डडुवाका २८ वर्षीय जीवन तामाङ घाइते भएका छन्।

प्रहरीका अनुसार गोले र पाख्रिनको अवस्था मध्यम रहेको छ भने आले मगर र तामाङको अवस्था सामान्य छ। घाइते चारै जनालाई हेटौँडामा प्राथमिक उपचारपछि थप उपचारका लागि चितवन पठाइएको छ।

घटना लगत्तै प्रहरीले चार जनालाई नियन्त्रणमा लिएर अनुसन्धान अघि बढाएको छ।

पक्राउ पर्नेमा हेटौँडा उपमहानगरपालिका–१२ पदमपोखरीका ३३ वर्षीय सुनिल थिङ, हेटौँडा–१५ भोर्लेका २८ वर्षीय करण लामा, मनहरी गाउँपालिका–१ मकरीका २३ वर्षीय उज्ज्वल बर्तौला र भक्तपुरको सूर्यविनायक नगरपालिका–२ का ३७ वर्षीय लक्ष्मण विष्ट रहेका छन्।

उनीहरूलाई जिल्ला प्रहरी कार्यालय मकवानपुरको हिरासतमा राखिएको प्रहरी नायब उपरीक्षक काफ्लेले जानकारी दिए।

थप व्यक्तिको खोजी

प्रहरीले घटनामा संलग्न अन्य व्यक्तिहरूको समेत खोजी गरिरहेको जनाएको छ। पार्किङको सामान्य विवाद कसरी धारिलो हतियार प्रयोग हुने अवस्थामा पुग्यो भन्ने विषयमा प्रहरीले अनुसन्धान गरिरहेको छ।

प्रहरीका अनुसार घटनाको वास्तविक कारण, संलग्न व्यक्तिहरूको भूमिका तथा प्रयोग भएको हतियारलगायतका विषयमा थप अनुसन्धानपछि विवरण स्पष्ट हुनेछ।

Originally published on abcnews.com.np.