काठमाडौँ । खाना पकाउने एलपी ग्यासको अभावका कारण समस्यामा परेका उपभोक्तालाई राहत दिन नेपाल आयल निगमले काठमाडौंका पाँच स्थानबाट ग्यास सिलिन्डर बिक्री–वितरण गर्ने भएको छ।

निगमले जिल्ला प्रशासन कार्यालय काठमाडौंको समन्वयमा भोलि साउन ३१ गते शनिबारदेखि तोकिएका बिक्री केन्द्रबाट विभिन्न ब्रान्डका ग्यास सिलिन्डर उपलब्ध गराउने जनाएको छ।

कुन केन्द्रमा कुन ग्यास?

टेकुस्थित निगम परिसरबाट नेपाल, एचपी, एभरेस्ट/सुगम, श्रीराम, सगर, सिद्धार्थ, श्री र हिमाल ब्रान्डका ग्यास बिक्री गरिनेछ।

चाबहिलस्थित यातायात कार्यालय परिसरबाट नेपाल र एचपी ब्रान्डका ग्यास उपलब्ध हुनेछन्।

राधास्वामी, कीर्तिपुर परिसरबाट नेपाल, एचपी, एभरेस्ट/सुगम, श्रीमाया, श्रीकृष्ण, साइबाबा र ओम ब्रान्डका ग्यास वितरण गरिनेछ।

राधास्वामी, बसुन्धरा परिसरबाट नेपाल, एचपी, एभरेस्ट/सुगम, भानु र ओम ब्रान्डका ग्यास बिक्री गरिने निगमले जनाएको छ।

त्यस्तै, बबरमहलस्थित पुरानो जिल्ला प्रशासन कार्यालय परिसरबाट नेपाल, एचपी, एभरेस्ट/सुगम, श्रीराम, सगर, हिमाल, एसटीसी, लोकप्रिय र सूर्य ब्रान्डका ग्यास उपलब्ध हुनेछन्।

नागरिकता वा राष्ट्रिय परिचयपत्र अनिवार्य

ग्यास खरिद गर्न चाहने उपभोक्ताले नागरिकता वा राष्ट्रिय परिचयपत्र लिएर तोकिएको बिक्री केन्द्रमा उपस्थित हुनुपर्नेछ।

निगमका अनुसार बिहान १० बजेदेखि साँझ ६ बजेसम्म ग्यास खरिद गर्न सकिनेछ।

टेकु, चाबहिल, कीर्तिपुर, बसुन्धरा र बबरमहल गरी पाँच स्थानमा बिक्री केन्द्र तोकिएसँगै ग्यास अभावका कारण लामो समयदेखि समस्यामा रहेका काठमाडौंका उपभोक्तालाई केही राहत पुग्ने अपेक्षा गरिएको छ।

Originally published on abcnews.com.np.