काठमाडौँ । नेपाली कांग्रेसका नेता शेखर कोइरालाले सर्वोच्च अदालतको पछिल्लो निर्णयसँगै पार्टीभित्र एकताको सम्भावना बढेको बताएका छन्।

शनिबार कांग्रेस इतर समूहको राष्ट्रिय भेलालाई सम्बोधन गर्दै कोइरालाले पार्टी एकढिक्का भएपछि राष्ट्रियताको पक्षमा उभिएर अन्य राजनीतिक दलसँग सहकार्य गर्नुपर्ने आवश्यकता रहेको बताए।

उनले कांग्रेसभित्र निरङ्कुशता स्वीकार्य नहुने स्पष्ट पारे। ‘पार्टीबारे सर्वोच्चको निर्णय हामीले स्वीकार गर्‍यौँ, तर स्वीकार्दा स्वीकार्दै पनि हामीले पुनरावलोकन गर्‍यौँ। हामीले अहिले निस्सा पाएका छौँ। न्यायपालिका स्वतन्त्र मात्रै होइन, निष्पक्ष पनि हुनुपर्छ,’ उनले भने।

एकताको आधार तयार भएको दाबी

विगतमा पार्टी एकताका लागि भएका प्रयासहरू सफल हुन नसके पनि सर्वोच्च अदालतको पछिल्लो निर्णयले कांग्रेसलाई पुनः एकताबद्ध हुने आधार तयार गरेको कोइरालाको भनाइ छ।

उनले पार्टीभित्र देखिएका विवाद समाधान गर्दै कांग्रेसलाई बलियो बनाउनुपर्नेमा जोड दिए। पार्टी एकताबद्ध भएपछि राष्ट्रिय मुद्दामा स्पष्ट धारणा राख्दै अन्य दलसँग सहकार्य गरेर अघि बढ्नुपर्ने उनले बताए।

पुनरावलोकनको पक्षमा

सर्वोच्च अदालतको निर्णय स्वीकार गरे पनि कोइरालाले त्यसको पुनरावलोकन आवश्यक रहेको बताएका छन्। न्यायपालिका स्वतन्त्र हुनुका साथै निष्पक्ष पनि हुनुपर्ने उनको जोड थियो।

कोइरालाको भनाइमा, पछिल्लो न्यायिक प्रक्रियाले पार्टीभित्रको विवाद समाधान र एकताको सम्भावनालाई थप नजिक ल्याएको छ।

Originally published on abcnews.com.np.