फिदिम, पाँचथर । पाँचथरको याङवरक गाउँपालिका–२ स्थित तिम्बुङ पोखरी आसपासका हिमाली चौर यतिबेला केञ्जो फुलेर सेताम्मे बनेका छन्। समुद्र सतहबाट करिब ४ हजार ३ सय मिटरभन्दा माथिको घाँसे मैदान तथा चट्टानी भूभागमा पाइने केञ्जो ढकमक्क फुलेपछि तिम्बुङ क्षेत्रको प्राकृतिक सौन्दर्य थप आकर्षक बनेको हो।

केञ्जो फुलेसँगै तिम्बुङ क्षेत्रमा आन्तरिक तथा बाह्य पर्यटकको चहलपहल बढेको स्थानीयवासी बताउँछन्। हरिया पातमाथि तह–तहमा सेता पत्र फैलाउँदै फुलेका केञ्जो टाढाबाट हेर्दा हिमाली चौरमा उभिएका सेता टावरजस्तै देखिने भएकाले स्थानीयले यसलाई ‘हिमाली टावर’ भन्ने गरेका छन्।

तिम्बुङ पोखरीका पर्यटन व्यवसायी अमिर राईका अनुसार केञ्जो फुल्ने चौरलाई ‘केञ्जो गार्डेन’ र केञ्जोलाई ‘हिमाली टावर’ भन्ने गरिएको छ। पर्यटकहरू केञ्जोले ढाकिएको चौरमा पुगेर तस्बिर तथा भिडियो बनाउने, प्राकृतिक दृश्यावलोकन गर्ने र हिमाली वातावरणको आनन्द लिने गरेका छन्।

पर्यटक बढेसँगै संरक्षणको चुनौती

दुर्लभ तथा औषधीय गुण भएको मानिने केञ्जो पर्यटकको चाप बढेसँगै संरक्षणको चुनौतीमा परेको छ। केही आगन्तुकले फुलेका बोट भाँच्ने तथा उखेल्ने गरेको स्थानीयवासीको भनाइ छ।

तिम्बुङ क्षेत्रमा प्राकृतिक रूपमा नै पर्याप्त केञ्जो पाइने भए पनि पर्यटकको बढ्दो चापका कारण यसको संरक्षण आवश्यक भएको स्थानीयवासी बताउँछन्। उनीहरूले प्राकृतिक सौन्दर्य जोगाउन पर्यटकलाई फूल नटिप्न र बोट नउखेल्न आग्रह गरेका छन्।

केञ्जोको संरक्षणसँगै तिम्बुङ पोखरी क्षेत्रको प्राकृतिक पर्यटनलाई व्यवस्थित रूपमा अघि बढाउन सके स्थानीय पर्यटन व्यवसाय र अर्थतन्त्रमा समेत योगदान पुग्ने अपेक्षा गरिएको छ।

Originally published on abcnews.com.np.