काठमाडौं । जाजरकोटको भेरी नगरपालिका–२ रिसाङमा अविरल वर्षापछि गएको पहिरोले घर तथा अस्थायी टहरा भत्काउँदा १० जना घाइते भएका छन्। पहिरोपछि तीन जना सम्पर्कविहीन भएका छन्।

प्रहरीका अनुसार शनिबार दिउँसो करिब ४ बजेदेखि परेको लगातार वर्षापछि रिसाङ क्षेत्रमा विभिन्न स्थानमा पहिरो गएको हो। पहिरोका कारण घर तथा टहरा भत्किएपछि जोखिममा परेका स्थानीयको उद्धारका लागि सुरक्षाकर्मी परिचालन गरिएको छ।

घटनास्थलमा नेपाली सेना, नेपाल प्रहरी र सशस्त्र प्रहरी गरी ५० जनाको संयुक्त टोली परिचालन गरिएको प्रहरीले जनाएको छ। टोलीले पहिरोमा परेका तथा जोखिममा रहेका व्यक्तिको खोजी तथा उद्धार गरिरहेको छ।

पहिरोका कारण भेरी नगरपालिका–३ स्याला निवासी पूर्णबहादुर विकको घर पूर्ण रूपमा क्षतिग्रस्त भएको छ। घरमा क्षति पुगेपछि उनको परिवार आफन्तको घरमा आश्रय लिएर बसेको छ।

त्यस्तै, भेरी–२ रिसाङकी भैरवी केसीका दुईवटा टिनका अस्थायी टहरा पनि पहिरोले बगाएको छ। ती टहरामा भने हाल कोही बसोबास नगरेकाले मानवीय क्षति नभएको प्रहरीले जनाएको छ।

पहिरोमा परी ६० वर्षीय रामबहादुर शाही, ४५ वर्षीय सिद्धिबहादुर कामी, ५७ वर्षीया भद्राकली कार्की, ४५ वर्षीय मनवीर चदरा, ४७ वर्षीया मोतीकला विक, ५२ वर्षीय केदार कार्की, करिब २३ वर्षीया अनिता कार्की, १० वर्षीय युनिश शाही र ४५ वर्षीया सुन्तली चदरा घाइते भएका छन्।

यस्तै, पहिरो आएपछि भाग्ने क्रममा भेरी नगरपालिका–२ फारुलाका ५४ वर्षीय उमासिंह खत्री, सोही वडाको चिसापानीका ७० वर्षीय भीमबहादुर कार्की र भेरी नगरपालिका–२ कै ८७ वर्षीया रती खत्री सम्पर्कविहीन भएका छन्।

सम्पर्कविहीन तीनै जनाको खोजीका लागि सुरक्षाकर्मी तथा स्थानीयवासी परिचालन गरिएको छ। लगातार वर्षा भइरहेका कारण पहिरोको जोखिम कायमै रहेकाले खोज तथा उद्धारमा कठिनाइ भइरहेको प्रहरीले जनाएको छ।

प्रहरीले घटनास्थलको अवस्था मूल्यांकन गर्दै थप जोखिममा रहेका परिवारलाई सुरक्षित स्थानमा सार्ने तथा घाइतेलाई आवश्यक उपचारको व्यवस्था गर्ने कामसमेत अघि बढाएको जनाएको छ।

Originally published on abcnews.com.np.