काठमाडौँ । अर्थमन्त्री डा. स्वर्णिम वाग्लेले नेपालमै डिजाइन तथा निर्माण गरिएको विद्युतीय स्कुटर ‘यात्री पी–टु’ को उत्पादन प्रक्रिया अवलोकन गरेका छन्।

बुढानीलकण्ठस्थित सिप्रदी यात्रीको कारखानामा पुगेर मन्त्री वाग्लेले नेपाली इन्जिनियर तथा डिजाइनरको पहल प्रशंसनीय रहेको बताउँदै स्वदेशी विद्युतीय सवारीसाधन उत्पादनलाई सरकारले सहयोग गर्ने प्रतिबद्धता जनाए।

उनले नेपालमै डिजाइन र निर्माण भएको विद्युतीय स्कुटरलाई विश्व बजारसम्म विस्तार गर्नुपर्नेमा जोड दिए। “तपाईंहरूले गरेको मेहनत सराहनीय छ। नेपालमै डिजाइन भएर निर्माण भएको विद्युतीय स्कुटर यात्री पी–टु सुखद कुरा हो। यसले गुणस्तरमा विश्वस्तरीय प्रतिस्पर्धा गर्न सक्नुपर्छ,” उनले भने।

मन्त्री वाग्लेले नेपालले आफैँ दुईपांग्रे विद्युतीय सवारीसाधन डिजाइन तथा निर्माण गर्नु ऐतिहासिक कदम भएको बताए। उत्पादनको लागत, गुणस्तर र बजार विस्तारमा ध्यान दिँदै अन्तर्राष्ट्रिय बजारमा प्रतिस्पर्धा गर्न सक्ने गरी अघि बढ्न उनले सुझाव दिए।

कठिन भूभागमा परीक्षण

सिप्रदी यात्रीका प्रमुख कार्यकारी अधिकृत राजनबाबु श्रेष्ठले ‘यात्री पी–टु’ नेपालका कठिन भूभागमा परीक्षण भइसकेको जानकारी दिए। उनका अनुसार नेपालमै दुईपांग्रे विद्युतीय सवारीसाधनको डिजाइन र उत्पादन हुनु महत्वपूर्ण उपलब्धि हो।

श्रेष्ठले स्कुटर छिट्टै सर्वसाधारणका लागि बिक्रीमा ल्याउने तयारी भइरहेको बताए। कम्पनीका अधिकारीका अनुसार डीसी चार्जरयुक्त दुईपांग्रे विद्युतीय सवारीसाधन नेपालमै निर्माण हुनु विशेष उपलब्धि हो।

उनले विद्युतीय ब्याट्री तथा स्कुटरका पार्टपुर्जा उत्पादनका लागि आवश्यक कच्चा पदार्थमा सरकारले सहुलियतपूर्ण नीति ल्याउनुपर्ने मागसमेत गरे।

सिप्रदीसँगको सहकार्य

नेदरल्यान्ड्सबाट इन्जिनियरिङ अध्ययन पूरा गरी नेपाल फर्किएका असिम पाण्डेले सन् २०१७ मा ‘यात्री मोटरसाइकल’ नामक स्टार्टअप स्थापना गरेका थिए। पछि सिप्रदी ट्रेडिङसँगको व्यावसायिक सहकार्यमा कम्पनी ‘सिप्रदी यात्री’का रूपमा अघि बढेको हो।

कम्पनीले आफ्नै डिजाइन र इन्जिनियरिङमा स्कुटर विकास गरी आवश्यक गुणस्तर परीक्षणपछि ‘यात्री पी–टु’ निर्माण गरेको जनाएको छ।

अर्थमन्त्री वाग्लेले कम्पनीका संस्थापक तथा प्रमुख कार्यकारी अधिकृत असिम पाण्डेसँग स्कुटरको डिजाइन, सुरक्षा परीक्षण, पार्टपुर्जा र परीक्षण प्रक्रियाबारे जानकारी लिएका थिए।

विश्व बजारमा प्रतिस्पर्धा गर्न सुझाव

मन्त्री वाग्लेले नेपाली उत्पादनलाई स्वदेशी बजारमा मात्र सीमित नराखी विश्व बजारमा विस्तार गर्नुपर्ने बताए। उनले नेपाली इन्जिनियर र डिजाइनरको मेहनतको प्रशंसा गर्दै सरकारबाट आवश्यक सहयोग उपलब्ध गराउने प्रतिबद्धता व्यक्त गरे।

उनले नेपालमा निर्मित ‘यात्री पी–टु’ ले अन्तर्राष्ट्रिय ब्रान्डसँग प्रतिस्पर्धा गर्न सकोस् र नेपाली उपभोक्ताले समेत खोजीखोजी चढ्ने अवस्था बनोस् भन्दै शुभकामना दिए।

Originally published on abcnews.com.np.